VOV4. M’nông: Tây Nguyên dôl lăp tâm khay wai kro phang ntoch jong âk khay aơ hŏ ƀư hang rbăn ha bri ta n'gor Gia Lai dâk ta năp geh ma nău ŭnh sa bri hô. Gay lor nchrăp tâm pah kan njrăng n'gang ŭnh sa bri, n'gor hŏ rdâk njêng trong nchrăp, nkre an ƀư ăp kôp âk trong nkra gay lor nchrăp rdâng lơh lor ăp nău tât mbra geh.   Mpôl ƀon Đôch 1, xã Ia Kreng, nkuâl Chư Pah dơn mât, njrăng uănh bơi 700 ha bri bah Ƀan mât njrăng bri tu dak nching sial Ia Ly. Ăp nar kêng dŭt khay 3, duh phang ntoch jong ƀư ăp ntôr bri ta aơ geh ăp pih ja kro, tơm brônh ƀư jêng dơh ŭnh sa bri. Gay lor nchrăp njrăng, n'gang, ƀơn Đôch 1 hŏ njêng ăp rmôt mât njrăng, tâm pă âk ntŭk gŭ mât chăm, hăn rsong uănh, mât njrăng bri ndăng măng nar. Lơn lah, nhih pah kan geh trong nchrăp ƀư su lor gay mât njrăng âk ha ta ăp nkual dơh geh ma nău ŭnh sa bri. Wa Rơ Chăm Ho, Làng Đôch 1, xã Ia Kreng, nkuâl Chư Pah, lah ngoăy tâm ăp rnăk dơn mât njrăng bri an gĭt:

“Dơi geh nău tâm pă kan ri mpôl hên njêng puăn rmôt hăn rsong uănh ăp nar, nsrôih râng mât njrăng bri, lah geh ŭnh sa ngăch kan nkre đah ăp mpôl kan kơt mpôl dân quân bah xã, công an viên, ngăch puh n'hât ŭnh, mô lah ŭnh sa bri du trong năn ngăch"

          Ƀan mât njrăng bri tu dak nching sial Ia Ly dôl mât njrăng rlău 12.500 ha geh bri. Ntơm bah bôk khay wai, nhih pah kan hŏ tâm pă ăp cán bộ, nuĭh kan way rsong hăn, rƀah gĭt nău lư ta nkual, lor nchrăp rdâk njêng trong nkra 4 ta ntŭk, nkre njêng ăp rmôt njrăng n'gang ŭnh sa bri đah mpôl âk hao tât hang rhiăng nuĭh. Nhih pah kan an ƀư ăp trong nkra kỹ thuật đŏng kơt su lor pih rêp, ƀư jik kuaih trong mbor nking bah ŭnh sa bri đah ăp rnoh bri geh ma nău ŭnh sa bri âk.

            Wa Phạm Thành Phước, Kruanh Ƀan mât njrăng bri tu dak nching sial Ia Ly, nkuâl Chư Pah, Gia Lai an gĭt, bol ma lơn âk neh bri bah đơn vị gŭ nchah nchrai ta âk ntŭk, ndrĭ yơn đơn vị hŏ ƀư an ăp trong nkra khlay gay rdâng lơh đah geh ma nău ŭnh sa bri.  Tâm nê geh du gâl n'hâm suan têh mpeh kônh wa tâm nău kơl đơn vị jik kuaih n'hanh su pih rêp gay njrăng n'gang ŭnh sa bri.  

“Nău mha êng khay wai ta Tây Nguyên lah dŭt kro phang, geh ma nău ŭnh sa bri mô gĭt năl lor, jêng đơn vị hŏ njêng ƀan rđău đă njrăng n'gang ŭnh sa bri. Ndơ̆ luh trong nkra, kí ton đah lĕ rngôch ăp ƀon lan, ăp rnăk ƀon lan gŭ rêh dăch kêng bri n'hanh kí ton đah ăp mpôl kan gŭ ta đơn vị n'hanh ăp xã geh bri tâm pă kan an ăp rmôt gŭ kâp chăm lah rnôk geh ŭnh sa ri nuĭh mbơh, n'hanh mhâm ƀư gay ngăch rdâng lơh đah nkô̆ nău ŭnh sa bri"./.

Nuĭh rblang: Điểu Thân