VOV4.M’nông: Bơi tât 10 năm tâm boh đah nau kan ntĭm nti tâm ngih săm ƀŭt Chính trị Dak Lak kŏ lah dŭm nê năm nô Phạm Văn Dương ƀư nau kan Đoàn ndrel nau kan druh ndăm tâm dâng. Mô êng geh âk nau dơi tâm nau kan, ma nô Dương hôm lah du hê cán bộ đoàn gơih nau kan, geh âk nau rgop ân nau kan bah Đoàn.

            Ăp nar aơ lah khay tơm bah khay druh ndăm, bol ma nau kan ntĭm nti tâm Khoa ndâk njêng Đảng, Ngih săm ƀŭt Chính trị n’gor Dak Lak, Thạc sĩ Phạm Văn Dương hôm nsôih râng ăp nau kan bah đoàn. Nô Phạm Văn Dương nkoch, nau ntĭm nti, mĭn rvê khoa học geh âk ngăn, yor ri ma nô knŭng dŏng nar dŭt pơh gay ma râng nau kan đoàn. Yơn lah, yor ŭch ngăn nau kan ri ma ntơm rnôk hôm sinh viên, nô Dương hŏ râng âk nau kan bah Đoàn kơt: Bôk nau kan hăn kơl an, yur mham kơl an, khâl ndrel pă nklâm ndơ tâm nkuăl jru ngai.

            Ntơm năm 2013, rnôk sĭt ndơn nau kan tâm ngih săm ƀŭt Chính trị, ndrel ma nau kan bah nơm, nô lŏ râng nau kan đoàn ndrel geh săch tâm rnoh moh săk Rnâng kan rđau kan, ƀư Groi bí thư Đoàn ngih săm ƀŭt, nkre lah Groi Bí thư ăp rmôt ntŭk kan ndrel nau kan tăch rgâl bah n’gor Dak Lak. Tâm moh nau kan, nô Dương kŏ mro mĭn ndrel njêng ăp nau kan ueh tâm di gay ntrŭt dăng nau kan đoàn:

             ‘Ntơm bah nau kan đoàn kŏ kơl an gâp têh jêng âk ngăn. Ntơm rnôk sĭt kan tâm ngih săm ƀŭt tât rnôk aơ ri gâp geh âk nau kan ngăn, kơt lah rnôk geh srê Covid-19 geh tâm n’gor nơm ri săk gâp nơm kŏ ndâk njêng bôk nau nchrăp kan ndrel rgŏ jă ăp rmôt kan tâm dâng ƀư môk rdâng nau mprănh dak diu ndrel rgum ăp mrôt kan gay ma kơl an ân mpeh ba lơ ngăn rdâng srê, ngăn lah ăp nau dak si ta nê”.

            Mô êng geh nau blau tâm nau ntrŭnh kan bah Đoàn, nô Phạm văn Dương hôm geh âk nau mĭn, nau kan ƀư ân dơi nau kan bah nơm, râng nau mĭn rvê khoa học. Lah giảng viên mom (deh năm 1989) yơn ntơm rnôk ndơn nau kan tât rnôk aơ, nô Dương geh 4 đề tài mĭn khoa học ăp gưl, 2 nau tâm nchră đah dak ba dih ndrel rlau 30 nau nchih tâm ăp báo, tạp chí. Âk nau mĭn, nau blau kan bah nô geh kơt tĭng tâm nau ngăn ndrel leo nsĭt nau săk tam. Mhe aơ, nô Phạm Văn Dương hôm râng nau kan rgŏ jă Mbơh nau kơl an ndâk njêng ndrel hun hao n’gor Dak lak sâm geh, ueh mhe đah nau nchih Rgum hun hao nau kan ê nkra geh nsum ma nau mât đăp mpăn rnă njrăng. Nau kan aơ hŏ geh n’gor kơp dơn ndrel leo tâm bôk nau nchrăp kan tâm rơh tât:

             ‘Tâm nau mbơh kan bah gâp ri geh nau kan ndŏ luh lah ân mhâm ƀư tâm nau rgum hun hao công nghiệp ê nkra ân geh nau dơi 2 ntil, nkre n’hao rnoh geh bah ntil ndơ nơm ƀư ma geh nsum ma nau mât đăp mpăn rnă njrăng neh dak. Kan ƀư nau rgum jao neh ntu, jao bri ân geh nau nsum ma nau blau dŏng đŏng. Đah rnoh neh tâm du đê̆ n’gỏ rnôk aơ ri lah dơi geh rklaih trong hoch dak ndrel uănh joi lĕ ƀom mìn ri nê lah nau dơi rgum ndrel pă neh tuch tăm ueh, pă rnoh nŭih gŭ, rmôt pah kan âk ndrel nkuăl aơ ân njêng luh ăp ntŭk gŭ bah nkuăl n’har bri ndrel păng kŏ lah geh nau khlay kơt lah du ntŭk gay ma njrăng mât nâp neh dak”.

            Nsôih, gơih kan tâm ăp nau kan bah đoàn, tâm nau pah kan êng bah nơm, ăp năm rlau aơ, nô Phạm Văn Dương hŏ geh ndơn âk nau rnê nkhôm tă bah n’gor ndrel Trung ương. Năm 2017, nô Dương geh Giám đốc Học viện Chính trị Quốc gia Hồ Chí Minh pă săm ƀŭt kơp dơn giảng viên blau lam dak. Năm 2019, nô geh ndơn bằng khen bah Tổng liên đoàn Lao động Việt Nam mpeh nau blau tâm nau kan pah kan blau, ueh. Nô lah ngoai tâm bar cán bộ geh ndơn nau nkhôm Lý Tự Trọng năm 2021. Ndơn nkoch mpeh giảng viên mom Phạm Văn Dương, Tiến sĩ Đỗ Văn Dương, Groi hiệu trưởng ngih săm ƀŭt chính trị n’gor Dak Lak, kơp dơn:

             ‘Đồng chí Phạm Văn Dương lah ngoai tâm ăp nŭih cán bộ đoàn mom geh nau blau, nau gơih. Phung hên kŏ kơp dơn, rnê prêh đồng chí geh âk nau rgop tâm nau mĭn nau kan, nau ntĭm nti pah kan bah ngih săm ƀŭt, Đoàn ngih săm ƀŭt kŏ kơt lah bah đoàn khối gưl kan ba lơ. Kơt lah ăp năm Phạm Văn Dương kŏ râng ngăn ăp nau kan ma đoàn gưl kan ba lơ kŏ kơt lah bah ăp rmôt kan mbơh rgŏ jă tâm rlong ri râng da dê”.

            Nô Phạm Văn Dương nkoch, nô saơ rhơn ngăn ndrel ma ntô̆ n’hao đŏng rnôk geh ndơn nau kơl an ndrel nau pơk trong nơih bah rđau kan ntŭk nơm pah kan, nau kơl an bah băl pah kan nsum. Nê mra lah nau nsôih gay ma nô lŏ dŏng ăp nau blau kan bah nơm, râng ndrel pah kan âk lơn tay tâm nau kan kŏ kơt lah nsôih lơn tâm nau kan ntĭm nti bah nơm./.

                                    Nŭih rblang: H’Thi