VOV4.M’nông – Kêng măng 9/4, Bí thư Trung ương Đảng-Groi Thủ tướng Chính phủ Lê Minh Khái ndrel ăp nuĭh ntoh măt Quốc hội tâm Mpôl Đại biểu Quốc hội n’gor Bạc Liêu geh nar mâp nuĭh ƀon lan n’gor Bạc Liêu jêh rơh rƀŭn tal 11, Quốc hội khóa 14. Mpôl kan lĕ mbơh đah nuĭh ƀon lan mpeh jêh rơh rƀŭn tal 11, Quốc hội khóa 14 n’hanh jêh pah kan bah Mpôl Đại biểu Quốc hội n’gor Bạc Liêu khóa 14, năm kan 2016-2021.

Groi Thủ tướng Chính phủ Lê Minh Khái ntoh ngơi ta nar mâp nuĭh ƀon lan

Nuĭh ƀon lan n’gor Bạc Liêu lĕ uănh lah prêh nkô̆ nău rơh rƀŭn tal 11 n’hanh nău kan bah đại biểu Quốc hội n’gor Bạc Liêu tâm năm kan bah năm. Nuĭh ƀon lan dăn đă du đêt nău đah Mpôl đại biểu Quốc hội n’gor kơt: Aƀaơ, gưl săk bí thư chi bộ nkre ƀư kruanh ấp nău kan dŭt jêr jŏt yor ƀư dŭt âk nău kan, prăk khay cán bộ bah dâng aƀaơ dŭt đêt an uănh mĭn tay n’hao rnoh ntop kơl. Ntoh ngơi ta nar mâp, Groi Thủ tướng Chính phủ Lê Minh Khái nkoch nău lah uĕh đah kruanh n’gor ủy, HĐND, UBND n’gor, ăp nău kan n’hanh nuĭh ƀon lan n’gor Bạc Liêu lĕ nsing nơm an mpôl đại biểu Quốc hội n’gor lôch uĕh nău kan tâm năm kan khóa 14 n’hanh ƀư kloh du đêt nău dăn đă bah nuĭh ƀon lan.

Nŭih rblang: Y Sưng Phê Ja