VOV4.M’nông: Lơ 14/4, rmôt hăn kan bah Hội đồng săch kan neh dak yor Thượng tướng Võ Trọng Việt-Kruanh uỷ ban neh dak rnă njrăng ƀư kruanh hŏ geh nar mêt uănh nau kan đăp mpăn rnă njrăng ndrel dak si nchrăp ân rơh săch kan ntơh măt Quốc hội ndrel HĐND ăp gưl năm kan 2021-2026 ta n’gor Gia Lai. Tĭng uỷ ban săch kan n’gor Gia Lai, n’gor hŏ ndâk 3 rmôt săch kan ma 3 rnâng kan săch kan ntơh măt Quốc hội ndrel ăp rmôt kan, rnâng kan săch HĐND ăp gưl, ndâl 1438 rmôt tâm ăp ntŭk nklăch phiếu lam n’gor. Ndrel ma nê, n’gor kŏ ƀư 2 rơh rƀŭn nchră, ƀư jêh ăp nau kan sŏk nau rgop bah cử tri ntŭk gŭ.

Rơh tâm nchră tal 3 nchrăp geh ƀư lơ 17/4. Mpeh nau rnă njrăng, Gia Lai geh rnâng kan mât nau kan, lơh rdâng ăp nau nsŭk đă, nkoch nau mô ueh, nau tih, phung rlăng geh tât nŭih ŭch geh săch. Nkre, n’gor hôm dôl pah kan bah 24 rmôt nâp ndrel 10 rmôt ntrơn hăn ƀư nau kan njrăng rdâng srê Covid-19 tâm nkuăl êp đah Campuchia. Ta nar pah kan, Thựong tướng Võ Trọng Việt-Kruanh uỷ ban mât rnă njrăng neh dak bah Hội đồng săch kan rnê prêh nau mât đăp mpăn ndrel dak si ân nau săch kan tâm Gia Lai, nkre rnơm nau ƀư săch kan mra geh nau ueh./.

Nŭih rblang: H’Thi