VOV4. M’nông: N'hao dăng hăn ôp uănh n'hanh mât lhăt nuĭh bah dih lăp, mpăng dŭt đêt geh ma nău nuh srê Covid-19 lăp tâm dak he. Nê lah ngoăy tâm ăp nău kan jăch ndăn ta rơh hop ôi aơ 14/4 ma Rnâng kan Ƀan rđău đă gưl neh dak đă n'gâng kan dơi kan n'hanh ăp n'gor, nkual ƀon têh tĭng ƀư. Groi Thủ tướng Vũ Đức Đam, Kruanh Ƀan rđău đă gưl neh dak njrăng n'gang Covid-19 ƀư tơm rơh hop. Rnâng kan Ƀan rđău đă gưl neh dak năl lah, nuh srê Covid-19 dôl tât krit nji ta âk dak tâm nkual tâm ban kơt Campuchia, Thái Lan, Malaysia… khuch tât pah kan njrăng n'gang nuh srê bah dak he. Rnôk dja ân mât nău dơi rdâng lơh dŭt têh yor tât aơ tay lah nar rlu lễ 30/4, nar 1/5, nău ŭch rsong hăn bah nuĭh ƀon lan hao âk. Tĭng Thượng tướng  Nguyễn Văn Sơn, Thứ trưởng Bộ Công an, ân mât kân lhăt tay ăp nuĭh bah dih lăp, nkre đah nău dơn kan bah UBND ăp n'gor, nkual ƀon têh, lơn lah đah ăp nuĭh dơi ăp doanh nghiệp wơt kơl. Groi Thủ tướng Vũ Đức Đam lah rjăp, rmal tay an dŭt lhăt ăp nuĭh bah dih lăp mô geh nău way./.  

Nuĭh rblang: Điểu Thân