VOV4.M’nông - Ta nkual ƀon têh Buôn Ma Thuột n’gor Dak Lak, Ntŭk kan wăng sa kan ndrel n’hanh hun hao ƀon lan tâm N’gâng kan tuch tăm mât rong n’hanh hun hao ƀon lan ƀư rƀŭn nchră mbơh ƀư nău kan năm 2021 nău kan wăng sa kan ndrel n’hanh hun hao ƀon lan đah âk trong mkra n’gluh an tâm nu nău srê Covid-19 mô hŏ đăp mpăn n’hanh ăp hiệp thương tăch rgâl dah rŏng geh tam.

          Mbơh ta rƀŭn nchră, kơp tât khay 3/2021, lam dak geh bơi 17.600 Hợp tác xã n’hanh 68 tâm rgop hợp tác xã pah kan tâm nău kan lŏ mir. 83% rnoh hợp tác xã pah kan săk rnglăy, hao 50% nkôp đah năm 2015. Nsĭt geh rĭng bah hợp tác xã lŏ mir rlău 380 rkeh prăk/năm. Lĕ geh 24% rnoh hợp tác xã ƀư tĭng tâm rgop tĭng trong, jêng bơi 1.500 ntrong kan đah rlău 2.300 ndơ n’hanh rlău 3.200 ntŭk tăch ndơ tĭng di nkra njêng uĕh.

Yơn lah, bôl lĕ geh rgâl yơn têh hvi nău geh n’hanh têh hvi nuĭh hợp tác xã lŏ mir hôm e jêt chrai; nău dŏng măy mŏk ƀư lŏ mir mô hŏ tâm ban; ăp nău kơl khlay kơt ntuh kơl ntop kơl ntung trong, ngăn lah ntung trong rhŏ nkra njêng tăch rgâl, nău kơl neh ntu, an manh prăk mô hŏ tŏng. Du đêt nău rgop an lah nău khlay gay hợp tác xã hun hao lah kon nuĭh, yơn dơi ntĭm rđau hợp tác xã hôm e đêt. Yor nê, n’hao ntop kơl, n’hao dơi mât uănh an mpôl kruanh n’hanh kruanh hội đồng quản trị HTX. Wa Mai Trọng Dũng, Groi Kruanh n’gâng kan tuch tăm mât rong-hun hao ƀon lan n’gor Dak Lak dăn đă:

“Tâm hun hao hợp tác xã dôl mâp du đêt nău jêr jŏt tâm nĕ geh jêr jŏt đah nuĭh kan cán bộ mât uănh hợp tác xã hôm e âk jêr jŏt. Bôl ndrĭ chi cục bôn lan lĕ geh âk jrô tiăr nti an ăp nuĭh hợp tác xã, geh âk jrô tiărr nti an kruanh hợp tác xã. Yơn lah mô hŏ tŏng nău ŭch n’gluh an. Êp tât mpôl hên mpŏng geh âk jrô tiăr nti jru hvi an kruanh ăp hợp tác xã gay an ăp hợp tác xã gĭt nău hun hao wăng sa kan ndrel ndơ̆ ăp hợp tác xã bah ăp ntŭk hun hao lơn”.

Lam ntŭk rƀŭn nchră

Ta rƀŭn nchră, ăp đại biểu lĕ djăt nău mbơh n’hanh tâm nchră ăp nkô̆ geh: Bôk nău kan mpeh wăng sa kan ndrel; Bôk nău rgop an tâm nchră mât ndray n’hanh hun hao ƀon nău kan lvang 2021-2030; nkoch mpeh ndơ OCOP; Tiăr nti quản trị n’hanh pơk dŏng công nghệ mrô tâm mât uănh dự liệu hợp tác xã. ăp đại biểu an lah ăp n’gâng kan nău kan geh tât an uănh kơp tay, lôch jêh trong pháp luật, trong ƀư, nău kơl đah hun hao wăng sa nsum, hợp tác xã lŏ mir (neh ntu, soay, an manh prăk). Ngăch dôh rklaih jêr jŏt, wăk kol, nta nơih an wăng sa nsum, hợp tác xã lŏ mir hun hao nâp nâl. Ngăn lah rnôk ăp Hiệp định tăch rgâl dah rŏng geh tam ri nău ndơ đăp mpăn, uĕh kah, rnă njrăng ndơ sông sa; tâm rlong ndoh ndơ mbra ƀư dŭt hô. Đah nău ndơ̆, ndơ geh bah nơm nău kan wăng sa kan ndrel tă bah ăp hợp tác xã, rmôt kân ndrel mbra tâm rgop hao khlay ndơ.

Đah nău kan khlay năm 2021, Ntŭk kan wăng sa kan ndrel n’hanh Hun hao ƀon lan n’gluh an hun hao wăng sa nsum, hợp tác xã, wăch rgum nuĭh kan jêh ntĭm nti sĭt pah kan ta Hợp tác xã, lơn lah cán bộ mom dơi ntop kơl prăk khay sĭt pah kan ta HTX tŏng ăp geh 1.500-2.000 cán bộ. Mbơh ƀư bôk nău kan ntĭm nti kruanh hợp tác xã gay an chứng chỉ ngih dak nău kan sơ cấp tĭng rpăi n’hanh bôk nău kan kan bah N’gâng kan tuch tăm mât rong n’hanh hun hao ƀon lan an. Ntop kơl n’hanh ndâk njêng ntrong kan tĭng nău ntrŭnh mrô 167/QĐ-TTg nar 3/2/2021 bah Thủ tướng Chính phủ uănh an bôk nău rgop an tâm nchră săch, lôch jêh, pơk hvi ntrong kan HTX trong mhe săk rnglăy ta ăp ntŭk tâm lam dak lvang 2021-2025. Wa Trần Thanh Nam, Groi Kruanh N’gâng kan tuch tăm mât rong n’hanh hun hao ƀon lan đă ăp ntŭk hun hao tay wăng sa kan ndrel, HTX tĭng ƀư măy mŏk nkra njêng, tâm rgop ntuh kơl công nghệ nkret njêng, hun hao ndơ lŏ mir tĭng trong âk nău kan, tăch rgâl, gay ntơm n’hao dơi tâm rlong an ndoh ndơ.

Groi kruanh n'gâng kan Trần Thanh Nam ntoh ngơi ntĭm rđau ta rƀŭn nchră

“He aƀaơ an geh du nău mĭn mhe, hun hao tĭng trong lŏ mir tâm rgop ân nău kan n’hanh hăn ndrel đah tăch rgâl ta ƀon lan âk HTX lŏ mir. Trong hăn tal 2 bôk nău kan OCOP dŭt tam ri nău kan lŏ mir ntơm hăn ndrel tâm nĕ jêng he an mĭn njêng gay ntrôl bôk nău kan aơ hao. Aơ lah nău kan bah ntŭk kan Wăng sa kan ndrel n’hanh Hun hao lŏ mir tâm rgop đah ăp ntŭk ndâk njêng nău kan jŏ jong”.

Tĭng Ntŭk wăng sa kan ndrel n’hanh hun hao ƀon lan, năm aơ mbra ƀư ntĭm nti an rlău 300.000 nuĭh pah kan nti nău kan lŏ mir gay  hao uĕh nĭh kan tâm di nău ŭch hun hao lŏ mir ndoh ndơ, têh hvi, rgum ntĭm nti an nuĭh pah kan hun hao nău kan thôn ƀon; ntĭm nti an nuĭh pah kan râng Bôk nău kan du xă du ndơ OCOP; ntĭm nti an nuĭh pah kan tâm ăp nkual nkra njêng ndoh ndơ. Ndâk njêng n’hanh pơk hvi du đêt ntrong kan măy mŏk tâm ban tâm lŏ mir, ngăn lah 06 ntrong kan măy mŏk tâm ban ta ăp nău kan ba phe n’hanh cà phê dôl ƀư ta ăp n’gor Gia Lai, Dak Lak, Đồng Tháp, Kiên Giang, Long An n’hanh Sóc Trăng. Ntop kơl hun hao nkra njêng lŏ mir, si gle, tui ka, doanh nghiệp an nuĭh ach o tĭng trong nkra njêng ndoh ndơ tâm di đah rgâl trôk nar mih n’hach; âk ntil ăp trong joi sa mô geh lŏ mir, nău kan tăch rgâl, tâm di đah nău geh ngăn.

Nuĭh răk rblang: Y Sưng Phê Ja