VOV4. M’nông: Ntơm bah ăp nău kan rgum ndŏk jê̆, mât sŭr uk, rvăt lịch tết gay ƀư prăk nkrem an trong leo ƀư trong nchrăp jê̆, âk kon se nti geh nău rêh jêr jŏt ta Dak Lak hŏ kơl tay suan hăn tât nhih nti. Tơm prăk nkrem bah trong leo ƀư hŏ dơi ăp nhih nti dŏng gay pă an học bổng, ntop kơl ndơ dŏng nti, kho ao răm an kon se nti ach o.

            Lôch rnôk nai Tổng phụ trách đội an ƀư tâm ôi chào cờ bôk pơh n'hanh nai chủ nhiệm ndrel ban cán sự jrô nti mbơh, jrô oh Nguyễn Quỳnh Nhi, jrô 7A2, nhih nti THCS Ngô Quyền, thị trấn Ea Drăng, nkuâl Ea Hleo, n'gor Dak Lak hŏ nsrôih rgum ndŏk gay ndjôt nôp. Nguyễn Quỳnh Nhi nkoch, oh n'hanh ăp băl dŭt nsrôih râng da dê trong nchrăp kan jê̆ tă bah nhih nti rgŏ jă. Mô geh ăp rnoh prăk têh gay rgop jêng gâp way prăp tĭng lha báo ơm, thŭng carton mô dŏng tâm rnăk mô lah donh ăp lha đaih sat hôm jăng mbrach ta jâng gung  nhih nti mô lah tâm jrô nti ndjôt sĭt gay nôp an  trong nchrăp  jê̆.

     “Ăp nar geh lha đaih sat mô hôm dŏng ri gâp nklăch tâm thŭng an ta njônh ntŭk gâp gŭ nti gay tât nar nôp lha đaih sat ri gâp mbra ndjôt rnoh lha đaih sat nê tâl tâm dŭng nilon n'hanh nôp an nhih nti. Gâp saơ dŭt rhơn yor mbra dơi kơl ăp băl ach o tâm nhih nti, rgop prăk kơl an ăp băl. Rlău ma nê nhih nti hên dŏng rnoh prăk nê gay ƀư ntŭk pâl rlưn đŏng".

     Đah trong an ƀư dơh, tâm rơh rgŏ jă lor bôk năp bah năm nti 2020 - 2021, nhih nti THCS Ngô Quyền hŏ rgum geh nklăp 2 tấn lha đaih sat, rnoh khlay bơi 3,5 rkeh prăk. Ndrel đah nê, ta nhih nti hôm an ƀư ăp nău kan đŏng kơt: rgŏ rgum kho ao, si ƀŭt nti, ndơ dŏng kơt nti hôm dơi dŏng gay pă an kon se nti nkual jêr jŏt. Tâm 5 năm nti mhe aơ, nhih nti hŏ rgop geh 1.500 blah kho ao; 800 ndrôm si ƀŭt; rlău 200 môk, ka tap, ndơ dŏng nti, tâm ban đah rlău 1,2 tấn ndơ an pă an druh ndăm rchong, kon se jê̆ geh nău rêh ta ăp xã nkual jru ngai ta nkuâl. Oh Phan Trường Nhất, Liên đội phó nhih nti THCS Ngô Quyền, thị trấn Ea Drăng, nkuâl Ea H’leo, n'gor Dak Lak nkoch:

     “Gâp saơ ăp băl nsrôih râng, ăp lha đaih sat jăng mbrach tŭp ta neh, ăp si ƀŭt hŏ tă lôch dŏng ri he mbra dơi rgum tay, rƀŭn tay ri mbra rgop tay gay kơl ăp băl ach o jêr jŏt, ăp băl jăp gơih rlău dơi jêr jŏt".

     Mô dơn êng nhih nti THCS Ngô Quyền, ntơm bah âk năm aơ, trong leo nchrăp kan jê̆ hŏ geh âk nhih nti gưl tiểu học n'hanh THCS ta Dak Lak an ƀư n'hanh pơk hvi. Đah âk trong ƀư êng êng kơt: Băl kơl băl, bar hê băl ndrel hăn, Rbâng phe tâm rŏng, Djăr mpôl khăn quàng đỏ, Prăk nkrem an băl ach o, Mât sŭr uk,…trong leo ƀư hŏ dơi rêng lam gay ƀư prăk nkrem ntop kơl an ăp kon se nti geh nău rêh jêr jŏt, rlău jêr jŏt nti blău. Oh Nguyễn Thái Thùy Linh, kon se nti nhih nti THCS Tân Lợi, nkual ƀon têh Buôn Ma Thuột, n'gor Dak Lak nkoch:

    “Ta nhih nti Tân Lợi hên geh dŭt âk trong leo ƀư kơl băl ach o kơt rgum lha đaih sat, rgop kho ao, rvăt lịch, nôp sŭr uk. Djăt ma tât kêng dŭt năm nhih nti dŏng prăk dja gay kơl ăp băl jêr jŏt. Gâp saơ dŭt rhơn n'hanh mpŏng nhih nti mbra kơl ăp băl âk lơn".

     Tĭng nô Trần Doãn Tới, Kruanh Hội đồng Đội n'gor Dak Lak, mô dơn ntop kơl ăp kon se jê̆ jêr jŏt, trong leo ƀư hôm rgop ntĭm nti đội viên, kon se jê̆ tiăr nti nău gĭt êng mpêt nkrem, jăp gơih kan, mât njrăng ntŭk gŭ rêh n'hanh nuih n'hâm tâm rnglăp, tâm kơl nsum, tâm nkoch, tâm têk ndrêng ăp nuĭh geh nău rêh jêr jŏt.

     “Ntơm bah ăp kilôgam lha đaih sat n'hanh bah ăp lon dak njŭng ăp kon se rgum donh geh ri hŏ rgop geh tay prăk gay ƀư âk lơn an bôk nău kan. Tâl bar lah ma ăp nău kan jê̆ kơt nê̆ ăp kon se geh jêng geh ăp nău gĭt êng tâm săk n'hanh ntơm bah nê jêng kon n'gơch ngăch, nău tâm pă, gĭt an ma nsum mpôl n'hanh kơl dơi ăp băl jêr jŏt lơn. Âk oh dơi dŏng n'hanh dơn geh nău ntop kơl bah ăp trong leo kan săk jê̆ ƀư nău kan jê̆, nê lah ăp nklâm học bổng, ăp nău ntop kơl bah mpôl mât bôk kan Đội tâm nhih nti n'hanh bah dih nhih nti".

     Ntơm bah tơm prăk nkrem trong leo ƀư trong nchrăp kan jê̆, âk mblâm jay, nkual pâl rlưn an kon se, ndơ ƀư măng non hŏ rdâk njêng dơi ta Dak Lak. Trong leo ƀư dja hŏ nsĭt tay nău geh tam ngăn ngăn, nta trong dơh kơl suan an ăp kon se  nti geh nău rêh jêr jŏt hăn tât nhih nti./.  

Nuĭh rblang: Điểu Thân