VOV4.M’nông: Ôi 28/4, ta nkual ƀon têh Kon Tum, HĐND n'gor Kon Tum khóa XI ntơm pơk rơh hop tâl 12, lah rơh hop n'glôch jêh năm kan 2016- 2021. Ntơm bah bôk năm kan tât rơh hop tâl 12 n'glôch jêh năm kan, HĐND n'gor Kon Tum khóa XI hŏ ƀư geh nău dơi 19 rơh hop, tâm nê geh 11 rơh hop nău way n'hanh 8 rơh hop way nkô̆; An dŏng 299 Nghị quyết ƀư ntŭk nsing gay ăp n'gâng kan, ăp gưl an tĭng ƀư.

Ăp nghị quyết bah HĐND n'gor Kon Tum an dŏng dơi uănh năl lah năn ngăch na nê̆ gung trong, trong nchrăp bah Đảng, trong kan, pháp luật bah ngih dak, tâm di đah ngăn ngăn ta n'gor ngăch lăp tâm nău rêh dơi doanh nghiệp, cử tri n'hanh ƀon lan tâm ban ŭch tĭng. Tâm 2 nar ƀư rơh hop tâl 12, HĐND n'gor Kon Tum khóa XI mbra mĭn uănh 65 nkô̆, lah 14 nău mbơh n'hanh 51 lha mbơh rblang, trong nchrăp nghị quyết. Tâm nê âk nkô̆ geh nău uănh  khlay bah cử tri n'hanh ƀon lan tâm n'gor, kơt: nău way sŏk n'hanh dŏng rnoh prăk sŏk geh nkhôm sơch lăp nti ăp gưl nti; mpeh ntop kơl doanh nghiệp jê̆ n'hanh dah găp ta n'gor Kon Tum lvang năm 2021-2025; N'glêh an trong nchrăp ntuh kơl, rgâl di trong nchrăp ntuh kơl đah du đêt trong nchrăp kan ntuh kơl mpeh n'glĕ nău dơi bah HĐND n'gor./.

    Nuĭh rblang: Điểu Thân