VOV4. M’nông: Ntơm bah bôk năm tât aƀaơ ta n'gor Kon Tum hŏ geh 15 kon se rmok dak yô̆ nđach. Rnoh âk rmok dak ta kon se dôl ôp đă n'gâng kan dơi kan ta ntŭk ƀư kloh nkô̆ nău n'hanh geh trong njrăng n'gang geh nău tam.

            Bơi du khay hŏ rlău kơp ntơm bah nar 3 kon se nti jrô 5B, nhih nti Tiểu học Nguyễn Bá Ngọc, xã Hòa Bình, nkual ƀon têh Kon Tum geh rmok dak, yơn wa Đinh Công Hoàng, Bí thư Chi bộ nkre ƀư Kruanh thôn 5 mô hŏ bah phit klach đŏng. Wa Hoàng an gĭt, ntŭk geh rmok dak yô̆ nđach ƀư 3 kon se jê̆ khĭt lah du klŏng dak bah dâng n'hong ndjoh dak bât Ia Băng. Aƀaơ djăt ma ăp tơ̆ hăn rlău nkual dja, ăp nău kop kir mpeh rmok dak tŭp tâm nuih n'hâm đŏng:

            "Rnôk nê nơh hŏ bơi măng hôm mơ dĭng rvah hăn joi kon, joi său. Rnôk tăng nău lư saơ bar pe hê kon se jê̆ hăn hăn pâl ta rlu cao su dja rnôk hăn tât ta aơ saơ ndeh wah jâng n'hanh kho ao ntlơi tâm mir cao su aơ mơ rgum jă oh nô jŭr nhâp. Dak jru dah kô̆ mâk dơm ma jŭr nhâp saơ du tơ̆ 3 hê kon se khĭt dĭl. Wơt lĕ du tơ̆ dĭl. Gâp dŭt rngot gâp mô ngơi luh du tong ngăn".

            Kơp ntơm bah bôk năm tât aƀaơ ta n'gor Kon Tum geh 15 kon se khĭt rmok dak. Tâm nê nkual ƀon têh Kon Tum geh 8 nuĭh; nkuâl Đăk Glei 4 nuĭh; nkuâl Đăk Tô 2 hê n'hanh nkuâl Đăk Hà 1 hê. Ndrĭ an saơ nkô̆ tơm ƀư jêng tât nău kon se geh rmok dak ta n'gor Kon Tum lah tă bah nău gĭt êng bah nsum mpôl lam ƀon lan mpeh njrăng, n'gang rmok dak an kon se hôm đêt; kon se mô geh nău mât uănh, groi nđôi ăp tŏng bah  me bơ̆ bu ranh n'hanh lơn âk kon se mô gĭt re. Ta năp nău ta n'gor geh mbro ăp rơh rmok dak ta kon se, wa Vũ Văn Đam, Groi kruanh Jrô kan mât njrăng, mât chăm kon se n'hanh Tâm ban bu ur bu klô, Sở Lao động- Thương binh n'hanh Xã hội n'gor Kon Tum an gĭt, nhih pah kan dôl n'hao dăng pah kan nkoch trêng n'hanh hŏ mbơh nsŏng kơl an n'gor rđău đă mpeh nău kan dja:

            "Mpôl hên n'hao dăng lơn đŏng pah kan nkoch trêng gay n'hao nău gĭt êng an lĕ rngôch ăp rnăk, đah kon se n'hanh lam rêh jêng kon nuĭh mpeh nkô̆ nău nsum ti mât njrăng kon se tâm njrăng n'gang rmok dak. N'gor geh si ƀŭt rđău đă an UBND ăp nkuâl, nkual ƀon têh ăp nkuâl, nkual ƀon têh ôp uănh tay ăp tŏng lam lĕ rngôch ăp nkual ntŭk geh ăp dak me, dak bât, dak n'glău ma mô hŏ geh pla nchih mbơh njrăng lor lah ntŭk klach rvê. Nkoch trêng n'hao nău gĭt êng an nuĭh ƀon lan tâm ban kơt ăp nhih pah kan dơi kan bah ăp dak bât dak n'glău klach rvê đŏng".

            Ndrel đah pah kan nkoch trêng n'hao nău gĭt êng mpeh njrăng, n'gang rmok dak an kon se, n'gâng kan ta ntŭk n'hanh n'gâng kan dơi kan n'gor Kon Tum dôl ntrôl dăng nău nti re an kon se. Yơn lah nău dơi blău nti du đêt tă bah ta n'gor geh dŭt âk bể re tâm rnôk lĕ rngôch ăp bể re tâm nhih nti tă bah n'gâng kan ntĭm nti mât dôl tâm nô nău mô tŏng prăk dŏng gay mât dŏng nti./.

Nuĭh rblang: Điểu Thân