VOV4.M’nông: Tâm lôch ăp khay tâm yan vai mhe rlau, rmôt kan, n’gâng kan ăp nkuăl, rmôt kan tơm mât bri ndrel nŭih ƀon lan n’gor Kon Tum hŏ n’hao dăng n’hâm ƀư du tŏ ndrel 2 nau kan, nê lah njrăng rdâng ŭnh sa bri ndrel mât njrăng bri.

Ntơm bah năp têt năm mhe Tân Sửu tât rnôk aơ, mrôt kan, ăp ntŭk tơm mât njrăng bri, nkuăl, nsum mpôl, ƀon lan ndơn nau mât njrăng bri tâm n’gor Kon Tum mro n’hao n’hâm mât njrăng ŭnh sa bri. Nô A Cường, ta ƀon Đăk Kon, xã Đăk Rơ Nga, nkuăl Đăk Tô mbơh, ƀon lan ndơn mât 270 ha bri bah Công ty TNHH du ntŭk kan mât njrăng bri Đăk Tô. Ndơn geh prăk mât njrăng bri, ri nơm ân geh nau kan ma bri:

  ‘Mât chăm tâm măng nar, ngăn lah mât njrăng ân bah ŭnh sa bri. Tết mât njrăng, mô geh tết kŏ mât njrăng đŏng, mât njrăng ân yan vai bah păng ŭnh sa. Ăp nar ri nơm ân hăn mêt uănh. Lĕ ma ƀon kơt nê da dê, tâm ndơn gay ma hăn uănh”.

Tâm nkuăl n’har bri Ia Hdrai, ntŭk geh rlau 88 rbăn ha bri ndrel neh tăm bri, wa Nguyễn Quốc Tuấn, Kruanh n’hâng kan mât njrăng bri bah nkuăl, mbơh:

 “Bri duh nar jŏ jong, yan vau ri mra geh ŭnh sa bri ngăn. Phung hên kŏ năl uănh ăp nkuăl mra geh ŭnh sa gay ma đă mât njrăng tâm măng nar, Ăp tơm mât njrăng bri geh rmôt ƀư nau kan mât njrăng bri đŏng. Rmôt nê nkre mât njrăng bri ndrel tâm nau kan kơl an mpuh n’hât ŭnh sa. Êp nê, nau ntrŭnh đă tâm rgop đah rmôt kan, đah Uỷ ban xã  jêh ri ăp rmôt kan dôl geh kan tâm nkuăl. Ăp tơm mât njrăng bri kŏ ân geh ƀư ăp nau kan geh đă tĭng nau kan 4 ta ntŭk gay ma kơl an ndal lah geh ŭnh sa bri”.

Nau kan mât njrăng bri tâm n’gor Kon Tum rơh rlau aơ mô êng duh mpeh bri. Tâm ăp rơh tâm nchră mpeh neh bri, geh du nuih n’hâm geh ntoh ngăn, ne elah nsôih ngăn bah rđau kan n’gor kŏ kơt lah ăp ntŭk n’gâng kan êng tâm nau mât njrăng neh bri dôl geh ndrel tăm tay bri. Ta rơh rƀŭn lôch nau kan mât njrăng, hun hao bri năm 2020, ntrŭnh nau kan năm 2021 ndrel ăp năm ba kơi, BÍ thư n’gor uỷ Kon Tum Dương Văn Trang lah rjăp, ân geh jao nau kan ân ăp gưl uỷ, rmôt kan, nkuăl, tơm mât njrăng bri ndrel ân mhal rjăp ăp cán bộ, đảng viên tih tâm nau kan mât njrăng bri:

 ‘Ăp gưl ân geh ƀa ƀơ ngăn tâm nau rđau đă, rđau tâm nau kan mât njrăng bru ân geh nau tam, nau nâp lơn ndrel nŭih dâk bôk ăp gưl kan ri ân geh rđau ngăn lah hôm nau ê geh nau dơi ri nŭih dâk bôk bah ntŭk kan nê ân ndơn nau tih ê lor. UBND nkuăl, UBND xã, ăp tơm mât njrăng bri geh jao nau mât njrăng ân geh ndâk nau nchrăp, ân geh rđau nau mât uănh ƀa ƀơ, mro mrăng. Lah ân geh nau tih ri ân ndơn nau tih bah năp n’gor uỷ. Mhal ân rjăp cán bộ, đảng viên geh nau tih nau ntrŭnh đă rnôk ƀư nau kan mât njrăng bri”.

N’gor Kon Tum dôl nsôih ngăn tâm nau mât njrăng bơi tât 549 rbăn ha bri chăt êng, rlau 61 rbăn ha bri tăm dôl geh ndrel ndŏ nau kan tâm 5 năm tât tăm mhe geh 15 rbăn ha bri, Gay dơi geh ƀư nau aơ, ngoai tâm ăp nau kan khlay ma n’gor Kon Tum uănh năl lah lŏ ƀư tĭng ân ueh nau kan săk tam bah nau trok tâm rnôk mât njrăng bri tâm nau kan mât ndrel hun hao bri./.

                        Nŭih rblang: H’Thi