VOV4.M’nông: Krông Pách lah nkuăl geh rnoh nuĭh sĭt bah nkual ƀon têh Hồ Chí Minh n’hanh ăp n’gor mpeh bah Dâng âk ngăn n’gor Dak Lak, đah rlău 2.700 nuĭh. Gay nuĭh ƀon lan plơ̆ sĭt geh ntŭk đăp mpăn, săk rnglăy njrăng n’gang srê Covid-19, nkuăl Krông Pách lĕ geh âk trong ƀư uĕh, mĭn ƀư mhe, kơl ăp nuĭh ƀon lan n’hanh rnăk wwâl bah khâl pơng đăp mpăn lơn. Đah trong ƀư aơ dŭt tâm di đah nkual ƀon lan, dơi kơt dŏng đah ăp ntŭk êng ta Tây Nguyên.

          Plơ\ sĭt ndrel bah n’gor Bình Dương, nô Đồng Thanh Hiếu n’hanh du hê nuĭh băl dôl ƀư nkhah êng tâm choanh ta n’gul mir cà phê ta thôn Cao Bằng, xă Ea Knuếc, nkuăl Krông pách. Nô an gĭt, rlău 3 khay mô geh nău kan tâm nkual srê, rnoh prăk ntêm lĕ dŏng tât n’gleh dŭt. Jêh rnôk Bình Dương pơk nkhah êng, nô lĕ nchoh ndeh măy sĭt ƀon. Tă bah rnăk wâl mô geh prăk nkhah êng jêng nô dơi n’gâng kan ƀon lan pă an đah du hê tay tâm choanh mir cà phê

          “Sĭt ri me bơ̆ n’hanh thôn pă an choanh bah oh sĭt ndrel 2 oh nô nkhah êng ta aơ. Ăp nar ri me bŏ njŭn ndơ sa, mê̆ bơ̆ an ta bah dâng, rnôk mê̆ bơ̆ hăn ri oh jŭr sŏk. Sĭt lah oh mĭn nkhah êng du trong rjăp”.

          Wa Triệu Văn Đường, groi kruanh thôn Cao Bằng, xă Ea Knuếc an gĭt, tâm ăp nar bah năp, thôn lĕ wơt âk nuĭh sĭt bah ăp n’gor mpeh bah dâng. Gay dăp an ntŭk gŭ tâm di, đăp mpăn njrăng n’gang srê tĭng di nău ntrŭnh, Mpôl mât uănh êng thôn lĕ kơp rnoh rnăk geh jay tâm mir cà phê, geh jay nsoih, jêh nĕ tâm nchră tâm ban ŭch đah ăp rnăk an manh ăp jay nĕ gay ƀư ntŭk nkhah êng. Trong kan groi nđôi nuĭh nkhah êng dơi Mpôl mât uănh n’hanh Rmôt kan Covid-19 ntŭk gŭ rêh bah thôn ƀư tĭng rjăp:

          “Rnôk sĭt nkhah êng an nkoch trêng kônh wa an ƀư tĭng di 5K gay mât đăp mpăn an kônh wa kơt ƀon lan oh nô bah thôn nơm. Ăp nar hăn uănh nđôi geh nkhah êng đŏng lah mô, yor âk nuĭh wât hôm e đêt an nkah ntĭnh ƀa ƀơ”.

Nkhah êng tâm choanh n’gul mir cà phê.

        Hôm ta xă Ea Yiêng, xă nkual 3 bah nkuăl Krông pách, yor rnoh jay tâm mir dŭt đêt, n’gâng kan ƀon lan lĕ manh dŏng ăp jay ntŭk rgum rƀŭn nsum bah tĭng thôn n’hanh du đêt ndơ dŏng ƀư nkhah êng n’hanh kuăl aơ lah ăp “jay ƀon lan mât”. Tâm ăp ndơ dơi ndâk ƀư ăp mpir nchăng đah ni lông tâm di đah rnoh nuĭh nkhah êng. Mpôl mât uănh êng ăp thôn tâm rgop đah rmôt kan covid-19 ntŭk gŭ rêh n’hanh rmôt druh ndăm hăn rgŏ jă ndơ sông sa, pă nuĭh n’gôn, pă an nuĭh tâm “Jay ƀon lan mât”. Mpôl druh ndăm ƀon lan lĕ rgŏ jă ăp bôk nău kan ntop kơl ndơ sông sa gay đăp mpăn an nuĭh ƀon lan đăp mpăn ƀư tĭng nkhah êng. Nô Trần Đức Hậu, Groi Kruanh Hội Liên hiệp druh ndăm Việt Nam nkuăl Krông pách an gĭt:

          “Hội Liên hiệp druh ndăm Việt Nam nkuăl ƀư nău kan n’gôn piăng sa tâm pă ăp nar sa an Mpôl mât uănh êng, nkre ntop kơl piăng ta kêng măng mpôl hên ntop kơl tay ndơ dŏng gay Mpôl mât uănh thôn ƀon n’gôn n’hanh pă an rmôt nkhah êng ta ntŭk”.

Rnăk wâl an ndơ sông sa an nuĭh nkhah êng.

          Ta nkuăl Krông Pách, n’gor Dak Lak, tâm rnoh rlău 2.700 nuĭh sĭt ƀon lan bah nkual ƀon têh Hồ Chí Minh n’hanh ăp n’gor mpeh bah dâng ri geh 11 nuĭh dôl nkhah êng rgum ta nkuăl, 54 nuĭh nkhah êng rgum ta ăp xă n’hanh 2670 nuĭh nkhah êng ta jay. Tŏng ăp nău nkhah êng rjăp gay njrăng n’gang srê, UBND nkuăl lĕ pă na nê̆ nău kan tŏng ntŭk kan dơi kan. Tĭng nĕ, nău kan dak si ƀư test ngăch an nuĭh ƀon lan 3 nar du tơ̆, ăp nar kuăl điện đă ƀon lan uănh êng duh săk, uănh nđôi săk soan; nău kan công an đăp mpăn rnă njrăng ta ăp ntŭk nkhah êng; ăp rmôt kan dơi kan, nsum mpôl rgŏ jă prăk, ndơ dŏng ntop kơl an kônh wa  bah meng nuĭh tơm prăk bah ngih dak. Wa Nguyễn Thị Kim Oanh, Groi Kruanh UBND nkuăl Krông pách nkoch:

          “Nkuăl an âk sam ƀŭt gay ntĭm rđău ƀư tĭng ntrôl dăng nău kan bah rmôt kan Covid-19 ta ăp nkuăl têh groi nđôi ăp rnăk geh nuĭh nkhah êng n’hanh mbơh ƀa ƀơ đah Ban ntĭm rđău njrăng n’gang srê bah xă nar 2 tơ̆. Nkuăl lĕ ndâk njêng rmôt đăp mpăn rêh jêng, rmôt kan aơ đăp mpăn nuĭh bah nkuăl kơt nuĭh rgŏ jă bah ăp nuĭh lŏng bôk tôr gay ntop kơl ngăch an ăp nuĭh ƀon lan nkhah êng tâm nar mâp jêr jŏt tă bah chôt srê Covid-19”.

Ăp mpir nking đah ni lông tâm di đah rnoh uĭh nkhah êng.

Knơm trong ƀư tâm di, trong kan nkhah êng nuĭh ƀon lan plơ̆ sĭt bah nkual ƀon têh Hồ Chí Minh ăp n’gor mpeh bah dâng ta nkuăl Krông Pách dôl dơn geh nău tâm ban ŭch bah nuĭh ƀon lan. Bôl gĭt âk jêr jŏt n’hanh nău klach, yơn đah nău nchrăp uĕh bah ăp gưl ăp nău kan n’hanh nău ndrel soan bah nuĭh ƀon lan, nsing nơm Krông Pách mbra groi nđôi uĕh chôt srê Covid-19 ta ƀon lan./.

          Nu^h rblang: Y Sưng Phê Ja