VOV4.M’nông: Rlau 10 năm ƀư Kruanh ƀon, wa A Bưn (rnoi Bana) ta ƀon Kon Tum Kơ Pâng, Phường Thắng Lợi, nkuăl ƀon têh Kon Tum, n’gor Kon Tum nsôih bonh đă kônh wa ndâk nau rêh văn hoá tâm ntŭk gŭ, rgop nau mât nau tâm rnglăp lam ƀon lan. Wa kŏ lah nŭih ntoh lư tâm nau pah kan jan sa, jăp blau.

Kruanh ƀon A Bưn mĭn, knŭng geh nau nsôih lôch n’hâm nơm tâm nau pah kan mơ dĭng dơi hun hao. Gay dơi geh ƀư kơt nê, săk wa nơm mô rlu nsôih kơt tĭng, rgum nau blau ndrel ngăn lah nau mĭn tuch tăm, blau tâm rgâl tơm tăm, tăm tâm pleh, ntrơn rgâl tơm tăm ân tâm di tĭng yan.

Năm 2019, rnôk rnoh chia yong hao khlay, wa ntrơn rgâl ntơm bah 6 sào bum blang jêng tăm chiah yong. Jêh 8 khay tăm, mât chăm, rnăk wa geh bơi tât 200 rkeh prăk tăch chah yong rih. Tâm rnôk kâp klih 5 ha cà phê, 3 ha bời lời, wa tăm tay bum blang, prit ndrel ba gay ma geh nau văng sa ƀa ƀơ, đăp mpăn. Ntơm bah tơm prăk geh têm nkrem, rnăk wa rvăt ndeh têh gay ma ndreng tuh mboh bum play bah kônh wa. Nkŭp lĕ rnoh prăk ƀư bôk năp, nau geh ăp năm bah rnăk wa ntơm 250-300 rkeh. Wa A Bưn nkoch: ‘Ăp nau kan ri nơm ân leo lor, ƀư nau pah kan jan sa ân geh tâm kơl, gâp bonh đă kônh wa ƀon lan, gâp leo lor, kônh wa tĭng ba kơi nau ma mât nau tâm rnglăp tâm kơl, tâm dăch dơh gay ma jủ n’huch ach o, jki ngot”.

A Bưn tâm nar mbơh nau pah kan jan sa jăp blau.

Ntơm bah Kruanh ƀon A Bưn pah kan jan sa blau, nau kan tâm rlong pah kan jan sa tâm ƀon Kon Tum Kơ Pâng lơn ma geh rêng âk. Ƀon geh 365 rnặk, rlau 1.500 nŭih đah nklăp 80% kônh wa rnoi mpôl đê̆ gŭ rêh. Nau nsôih gay ma hun hao văng sa bah ƀon lan kơl an nau geh jêng bah du hê bôk nŭih tâm nkuăl geh rlau 27 rkeh/năm. Nau văng sa ăp nhoat hao âk, đăp mpăn, kônh wa nar lơn tâm rnglăp, tâm kơl, nsum n’hâm ndâk njêng ƀon lan mhe tâm ntŭk gŭ.

Wa Nguyễn Văn Hùng, Kruanh UBND Phường Thắng Lợi, nkuăl ƀon têh Kon Tum, n’gor Kon Tum mbơh tay “A Bưn lah Kruanh Thôn Kon Tu Kơ Pâng rlau 10 năm hôm. Năm e, ƀon lan kŏ rnơm ân săch đă păng ƀư Kruanh ƀon năm kan 2020-2022. Tâm rnôk pah kan, A Bưn dŭt gơih ngăn, leo lor tâm ăp nau kan nkoch trêng, bonh đă ƀon lan ƀư ân ueh nau kan ƀon lan mhe, ƀư trong bê tông. A Bưn kŏ lah ngoai tâm ăp nŭih ntoh ang tâm nau kan gay ma kônh wa kơt tĭng”.

Gơih pah lă pah kan, blau tâm nau kan tuch tăm hŏ kơl an Kruanh ƀon A Bưn tâm nkuăl ƀon têh Kon Tum geh ngih vâl nâp ueh, nau rêh bah rnăk vâl đăp mpăn. Đah nau mĭn blau tâm ăp nau kan ndrel ăp nau rgop kơl an ân ƀon lan, Kruanh bôn A Bưn lah nŭih leo lor ntoh ang ngăn tâm nau tâm rlong rŏng dak gay kônh wa ƀon lan kơt ntĭm nti, kơt tĭng./.

Nŭih rblang: H’Thi