VOV4.Mnông – Ôi nar nđaơ (21/4), jêng nar 10/3 âm lịch, ta Nkual Di tích lịch sử Đền Hùng, TP Việt Trì, n’gor Phú Thọ, ƀư mpoh nhang nkah gĭt, plơng tay n’hâm soan ăp Kđăch Hùng. Kruanh dak Nguyễn Xuân Phúc tât râng n’hanh mpoh nhang. Ndrel râng nar ƀư geh Ủy viên Bộ Chính trị, Rnâng kan Ban Bí thư Võ Văn Thưởng; Ủy viên Bộ chính trị, Kruanh ban Tổ chức Trung ương Trương Thị Mai; ăp đồng chí kruanh, tă ƀư kruanh Đảng, ngih dak; kruanh du đêt n’gâng kan, nău kan, ƀon lan. Nar Giỗ Tổ Hùng Vương lah nar giỗ lam dak, lah nar lam dak rnê n’hâm soan ăp Kđăch Hùng lĕ geh soan ndâk njêng neh dak.

Kruanh dak Nguyễn Xuân Phúc mpoh nhang nkah gĭt ăp Kđăch Hùng

Jêh ƀư lễ ta Đền Thượng, Kruanh dak Nguyễn Xuân Phúc n’hanh mpôl hăn an nkao ta Lăng Hùng Vương. Nkao geh nchih: Mro mrăng nkah gĭt ăp Kđăch Hùng lĕ geh soan ndâk njêng neh dak. Jêh an nkao, Kruanh dak n’hanh Rmôt lĕ an nkao ta Rup ndah Wa Hồ nkoch bri đah ăp tahen Đại đoàn quân Tiên Phong.