VOV4. M’nông: "Ăp đơn vị tahen ân leo lor dâk bôk năp, tĭng bư moh tăm tơm uĕh jêng tơm nê, nsrôih gŭ mĭn tăm tơm si têh gay mât njrăng neh ntu jŏ jong. Mât uĕh tay nău khlay kan bah ăp mpôl wăng sa, njrăng n'gang neh dak n'hanh ăp đơn vị geh dơh uĕh mpeh neh ntu, ntŭk dơh gay tăm si, hao jêng bri" Aơ lah nău dăn đă bah Kruanh dak Nguyễn Xuân Phúc đah ăp nhih pah kan tahen ta rơh Lễ rgŏ jă tăm si mbro mbrăng nkah gĭt wa Hồ tă bah Bộ Quốc phòng ƀư ôi 13/4 ta nkual di tích lịch sử K9-Đá chông, Ba Vì, Hà Nội. Tĭng nău mbơh bah Bộ Quốc phòng, tâm lvang năm 2015-2020, lam tahen hŏ tăm geh bơi 11 rkeh tơm si ăp ntil. Ntơm bah bôk năm tât aƀaơ ăp đơn vị tâm tahen hŏ tăm geh 1,5 rkeh tơm si, 737 ha bri, hao 2,7 tơ̆ rđĭl đah ndrel khay dja năm e nơh. Lam tahen nsrôih mbra ƀư lôch jêh trong nchrăp tăm 3,3 rkeh tơm si n'hanh 1 rbăn 785 ha bri tâm năm aơ. Kruanh dak đă Bộ Quốc phòng ân rgum ntrôl dăng nkoch trêng tâm ƀon lan, tâm cán bộ, tahen mpeh nău khlay ƀư tơm, nkô̆ khlay bah nău tăm si, tăm bri, nkre an ƀư geh nău tam bôk nău kan 1 rmen tơm si- yor du Việt Nam nđĭr uĕh đah ăp trong nchrăp kan na nê̆ ngăn ngăn./.

Nuĭh rblang: Điểu Thân