VOV4.M’nông –  Dơn nău jă bah Kruanh n’gâng kan mât njrăng bri dak Việt Nam, mpôl ntoh măt tahen gưl prêh dak Cộng hòa Nhân dân Trung Hoa yor thượng tướng Ngụy Phượng Hòa, Ủy viên Quốc vụ, Kruanh mât njrăng bri dak, ƀư kruanh mpôl hăn khâl na nê̆ Việt Nam bah nar 24 tât 27/4. Ƀư wơt dơi ƀư kêng măng 25/4, ta Hà Nội, yor thượng tướng Phan Văn Giang, Ủy viên Bộ chính trị, Groi bí thư Quân ủy Trung ương, Kruanh N’gâng kan mât njrăng bri dak Việt Nam ƀư tơm.

Ƀư wơt kruanh n’gâng kan mât njrăng bri dak Trung Quốc

Jêh ƀư wơt, mpôl ntoh măt tahen gưl prêh 2 dak ntơm rgum nchră. Thượng tướng Phan Văn Giang mĭn lah Đảng, Ngih dak, Chính phủ n’hanh tahen ƀon lan Việt Nam uănh khlay nău nâp nâl dăch dêh way ơm n’hanh ntrôl  tâm boh kan ndrel têh hvi đah Trung Quốc. Thượng tướng Ngụy Phượng Hòa mĭn lah, tâm boh kan ndrel mât njrăng bri dak đah Trung Quốc n’hanh Việt Nam lah tâm âk nău ƀư khlay, rgop n’hao tâm boh dăch dêh, kan ndrel đah 2 Đảng, Ngih dak, yor uĕh bah ƀon lan 2 dak, yor đăp mpăn, kan ndrel, hun hao ta ăp dak kơt bah nkual n’hanh lam ntŭr neh.

Nuĭh răk rblang: Y Sưng Phê Ja