VOV4. M’nông: Ôi 26-4, wa Phan Diễn - Kruanh Prăk nkrem nsum mpôl njrăng- n'gang trôk nar lơh (Viện Tài nguyên n'hanh Môi trường-Đại học Quốc gia Hà Nội) leo mpôl hăn hŏ pah kan hŏ geh rơh pah kan đah n'gor Gia Lai mpeh du đêt nkô̆ tâm pah kan mât uănh, njrăng n'gang n'hanh hun hao bri. Nău mbơh ta rơh pah kan an saơ, 5 năm rlău aơ, hvi neh tăm bri ta Gia Lai geh rlău 25 rbăn ha.

Tât kêng dŭt năm 2020, rnoh nkŭm n'hâm bri ta n'gor dja geh 46,7%; pah kan mât, njrăng bri, njrăng n'gang ŭnh sa, puh n'hât ŭnh sa dơi uănh khlay rđău đă. Lah ta rơh pah kan, Kruanh Prăk nkrem an nsum mpôl njrăng- n'gang nău tât trôk nar lơh Phan Diễn nkoch đah n'gor mpeh ăp nău jêr jŏt dôl mâp. Prăk nkrem mbra kơl n'gor rdâk njêng trong nchrăp kan an nuĭh ƀon lan ta du đêt ntŭk tăm si têh jong nar rgâl bah hôm ma tăm si jê̆ ngăch koh tăch; mô lah tăm rlŭ tơm si ta mir cà phê gay nkre n'hao săk geh wăng sa, nkre n'hao tam mât njrăng neh. Yơn lah, n'gor ân geh trong kơl ntop kơl joi trong rêh an nuĭh ƀon lan tâm rnôk năm mhe tăm bôk năp đŏng gay khân păng đăp mpăn mât chăm, mât njrăng bri n'hanh nkre têk jong năm plơ̆ tăm tay bri lôch kăl tăch./.

Nuĭh rblang: Điểu Thân