VOV4.M’nông - Bôl lah ngoay tâm âk nkual rgum dak ta n’gor Dak Lak, yơn nkuăl Lắk hôm e mâp jêr jŏt tŏng ăp dak dŏng an nuĭh ƀon lan, ngăn lah tâm yan duh phang. Ta nkuăl têh Liên Sơn, kơh n’glău Lắk, n’glău dak geh êng têh ngăn Tây Nguyên, dŭt âk rnăk hôm e rwăt dak sĭt dŏng. Nău aơ lĕ dơi dăn đă tât ngih pah kan dơi kan âk tơ̆, âk tơ̆ dơi kơp dơn, yơn nău mô tŏng dak hôm e geh tay.

          Kơt âk rnăk nkuăl têh Liên Sơn, wa Ngô Công Tâm ta tổ dân phố Hòa Thắng, lĕ âk nar aơ an rwăt dak bình gay ƀư dak ngêt n’hanh n’gôn gâm. Rnăk knŭng geh 2 hê ur sai, dŏng dak ntêm nkrem, yơn ăp khay hoach bah 300.000-350.000 prăk.

 “Jay gâp hôm e 2 hê u, che ranh dơm, du nar dŏn g du bình 20 lít an nău ngêt, sa. Rĭng du nar du bình ri đah 30 nar roh 300.000-400.000 prăk/khay. Dak ntu bơm hao ri geh ăp brĭng ĕk dak hôm, knŭng ŭm pih kho ao đah rao jay, jŭt jay dơm. Dak mô ngĭr n’hanh ônh ndrĭ m’hâm dơi dŏng. Nuĭh ƀon lan njê yor mô tŏng dak dŏng dŭt âk. Ta ăp rơh rƀŭn mâp ƀon lah mô lah tổ dân phố, ƀon lan mpôl hên dăn đă tât gưl bah lơ âk ngăn, yơn khân pơng knŭng djôt dơn dơm mô hŏ saơ mkra an nuĭh ƀon lan”.

Hôm wa  Đoàn Thị Hồng ta tổ dân phố Hòa Thắng an gĭt, trong dak kloh uĕh pă an nuĭh ƀon lan tâm nkual lĕ jur djơh n’hanh dŏng mô tam. Bah âk năm aơ, kônh wa an rwăt dak bình mô lah gri sĭt gâm ngêt sa, Êng jay wa tăch ndơ ngêt sa, an rwăt bồn têh sĭt mư tŏng dŏng jêng dŭt hoach. Wa Hồng n’hanh rhiăng rnăk tâm nkual ŭch ngih pah kan dơi kan ntop kơl, nta an gay geh tu dak kloh uĕh đăp mpăn dŏng.

Hang rbăn rnăk ƀon lan ta ăp xă, nkuăl têh bah nkuăl Liên Sơn, n’gor Dak Lak mô tŏng dŏng tâm âk năm bah năp

“Jay gâp tăch biăp srat gay ndơ̆ ta chợ nkuăl têh jêng dŏng âk dak ngăn. Yan mih ri dŏng bồn n’gâr dak mih dŏng, yan wai dŏng dak măy yơn âk năm aơ djơh ri an rwăt dak bồn sĭt dŏng dơm. Rwăt dak ri hoach ngăn, tăch rgâl mô geh sa. Lư dơm ta nkuăl têh ma mô geh dak kloh uĕh dŏng. Kônh wa aƀaơ knŭng kâp ngih dak uănh min ntuh kơl an trong dak kloh uĕh gay kônh wa dơh oi njêng dơm”.

Kơp uănh bah UBND nkuăl têh Liên Sơn an saơ, lam nkuăl têh geh 1.680 rnăk đah rlău 6.590 nuĭh yơn geh du ndơ dak kloh uĕh 150 m3/nar/măng. Ndơ aơ dơi ntuh kơl bah năm 2000 n’hanh aƀaơ dŏng mô săk rnglăy, knŭng pă geh 90-100 m3/nar/măng, tŏng mô hŏ dơi geh 1/5 nău ŭch.

UBND nkuăl têh Liên Sơn lĕ âk tŏ njuăl dăn đă bah nuĭh ƀon lan tât UBND nkuăl n’hanh lĕ dơi djôt dơn, yơn tât aƀaơ, ta nkuăl têh Liên Sơn mô hŏ geh tay ndơ dak kloh uĕh dơi ndâk ƀư.

Dak ntu brĭng ăch dak n’hanh nău ăp ndơ dak kloh uĕh djơh mô dŏng ƀư nuĭh ƀon lan ta ăp ntŭk tâm nkuăl Lắk, n’gor Dak Lak khuch khat

Tĭng wa Nguyễn Anh Tú-Kruanh Ban mât uănh nău nchrăp ƀư nkuăl Lắk, âk năm aơ, nu nău mô tŏng dak dŏng mô knŭng geh ta nkuăl têh Liên Sơn ma hôm geh ta âk xă ta nkual kơt xă Đắk Nuê, Đắk Liêng, Buôn Tría.... Du gâl yor ăp xă aơ ta nkual rđŭng, tu dak mŭr geh brĭng ăch dak. Du gâl êng, yor lĕ rngôch ăp ndơ ƀư dak kloh uĕh rgum lĕ djơh da dê, mô hŏ dơi dŏng.

Wa Nguyễn Anh Tú mbơh, ngăch ngăn an tât năm 2023, nău dak kloh uĕh ta ăp ntŭk bah nkuăl Lắk mư dơi rgâl, đah 4500 rnăk dơi dŏng dak bah du nău nchrăp ƀư 3.600 m3 du nar măng.

“Tât rnôk aơ HĐND n’gor Dak Lak lĕ uănh an nău ntrŭnh ntuh kơl nău nchrăp ƀư khlay 90 rmen prăk an UBND nkuăl Lắk ƀư tĭng nău nchrăp ƀư dak kloh uĕh. Lvang 1 năm 2021 ri lĕ pă prăk geh 5 rmen gay ƀư tĭng nău uănh n’hanh ƀư sam ƀŭt rhăch nău ndâk nkra. N’hanh bah kơi tay, năm 2022 tĭng trong nchrăp pă prăk bah n’gâng kan Kế hoạch đầu tư ri mbra mbơh ƀư lvang 2 bah nău nchrăp ƀư mbra jêh tâm năm 2023 n’hanh ndơ̆ an dŏng”./.

Nuĭh răk rblang: Y Sưng Phê Ja