VOV4. M’nông: Pơh bah năp nơh, UBND n'gor Lâm Đồng hŏ geh rơh pah kan đah Ủy ban nuĭh Việt Nam gŭ ta dak bah dih ta Nkual ƀon têh Hồ Chí Minh ndrel ăp doanh nhân lah nuĭh ƀon lan he gŭ dak bah dih, nuĭh dak bah dih, gay tâm pă ăp nău lư, buăt nthoi ăp nuĭh ntuh kơl, doanh nghiệp, nuĭh Việt Nam gŭ ta dak bah dih, gay kuăl jă an ƀư ăp trong nchrăp kan ta n'gor.

N'gor Lâm Đồng hŏ nkoch mbơh tât mpôl pah kan bah Ủy ban nuĭh Việt Nam ta dak bah dih ta nkual ƀon têh Hồ Chí Minh n'hanh ăp nuĭh ntuh kơl, doanh nghiệp, doanh nhân nuĭh Việt Nam gŭ ta dak bah dih mpeh nău săk geh, dơh uĕh bah n'gor Lâm Đồng; mbơh gĭt nău lư ăp trong nchrăp kan dôl kuăl jă wăch rgum ntuh kơl kơt: Trong nchrăp kan pâl nđaih n'glău Prenn, Trong nchrăp ƀư nkual ƀon lan gŭ Liên Khương- Prenn, Nkual pâl nđaih gưl neh dak n'glău Tuyền Lâm v.v... Tĭng wa Nguyễn Văn Châu, Groi Giám đốc Sở Nông nghiệp n'hanh Phát triển Nông thôn n'gor Lâm Đồng, rlău ma săk geh mpeh pâl nđaih wăch rgum ăp năm nklăp 7 rkeh tơ̆ năch tât pâl nđaih, Lâm Đồng hôm lah n'gor dâk bôk năp mpeh nău kan tuch tăm dŏng công nghệ mhe đŏng. Yor kơt nê̆, n'gor dôl rgum nkoch n'hơ, kuăl jă n'hanh wăch rgum tay âk nuĭh ntuh kơl tâm dak, dak bah dih đŏng.

“He ân dơi lah tuch tăm Lâm Đồng hun hao mô dơi lah mô geh ăp doanh nghiệp, lơn lah ăp doanh nghiệp dak bah dih gay tuch tăm ta n'gor rƀŏng tât tăch n'gluh, n'hao rêng rnoh khlay lam ntŭr neh. Lơn lah ăp ndơ geh ƀư ăp ntil tơm tăm mbra săk geh âk kơt chè, cà phê, dâu tằm, biăp, kao n'hanh mât rong ndrôk dak toh…Lah ăp nuĭh ntuh kơl joi gĭt jru n'hanh geh ntuh kơl ri mbra kơl an Lâm Đồng hun hao”.

Lôch rơh pah kan đah n'gor, mpôl pah kan bah Ủy ban nuĭh Việt Nam gŭ ta dak bah dih ta Nkual ƀon têh Hồ Chí Minh n'hanh ăp doanh nghiệp, nuĭh ntuh kơl hŏ pah kan đah kruanh rđău kan nkuâl Lạc Dương, hăn uănh Tập đoàn Liên Minh, Công ty Nông sản Langbiang n'hanh hăn uănh năl ăp trong nchrăp ntuh kơl dôl dơi n'gor Lâm Đồng kuăl jă ntuh kơl đŏng.

Wa Steve Bùi, Tổng giám đốc tập đoàn Delta E &C Japan an gĭt, aƀaơ ăp nuĭh ntuh kơl, doanh nhân, doanh nghiệp nuĭh Việt gŭ ta dak bah dih nar lơn ma geh nău ŭch plơ̆ tay ƀon tơm ntuh kơl. Yor kơt nê̆ trong hăn joi gĭt na nê̆ dja mbra lah ntung njŏ, jâng ntơm khlay pơk luh âk trong an ăp doanh nghiệp, doanh nhân nuĭh Việt gŭ ta dak bah dih râng ntuh kơl tâm n'gor. Wa Steve Bùi lah rjăp:

  “Mpôl hên dơn saơ lah n'gor Lâm Đồng lah du ntŭk wăch rgum ntuh kơl dŭt âk, ăp trong kan dŭt kloh rvah n'hanh mbơh kloh, nta trong dơh dŭt n'hâm an ăp nuĭh ntuh kơl tâm n'hanh bah dih dak tât đah n'gor. Mpŏng lah lôch hăn kan dja mpôl hên geh nău tâm boh lhăt tâm nkoch gĭt nău lư, n'hanh mbra sơch Lạc Dương lah ntŭk ntuh kơl lor bôk năp ta n'gor Lâm Đồng dja”.

Đah nău nsrôih bah n'gor ndjôt tât ăp trong kơl, nău nsing nơm an ăp nuĭh ntuh kơl, Lâm Đồng dôl rƀŏng tât nău đăt ndal mpeh wăng sa nsing tâm săk geh bah he nơm, tĭng ƀư rnoh tât hun hao wăng sa, rêh jêng kon nuĭh jŏ jong./.

Quang Sáng - Nuĭh rblang: Điểu Thân