VOV4.Mnông- Âk dak ta lam ntur neh dôl geh nsrôih kơl an gay ma Libya mbra dơi geh leo ƀư săch kruanh Quốc hội Libya ta khay 12. Aơ lah du njoat hăn khlay tâm ntrong kan kơl an nău mât đăp mpăn chính trị ta dak aơ. Nău nklơi jăng tahen đă tât lơh ta nkual neh Libya, tâm ban kơt nchrai lĕ tahen geh  phao blêu lah nău kan tơm khlăy gay ma mpŏng tât du ntrong kan chính trị đăp mpăn ta Libya. Âk dak ta lam ntur neh an lah nău geh tay ăp rnoh kơl kan pă an ndơ dŏng n’hanh nău kan an ăp mpôl ƀư rlăng ta Libya dôl ƀư tŭp rŭch ntrong kan chính trị, ƀư khuch lĕ ăp nău nsrôih gay ma dơi geh đăp mpăn tâm ban kơt mbra ntrôl an Libya tŭp ta du rơh tâm lơh mhe. Ủy ban quân sự mât kan lĕ rngôch Libya mhe geh mbơh du ntrong kan gay ma nklơi lĕ tahen đă tât lơh luh ngih dak aơ. Rlău ma nău nchrăp pah kan, Ủy ban aơ lĕ geh njêng du nău kan kuăl jă nău rhoăt lĕ tahen đă tât lơh, tahen dak bah dih. Nău nchrăp kan aơ lah tâm di đah nău tâm ton rlu tâm lơh dơi geh ta nar 23/10 năm 2020, ăp nău ntrŭnh bâh Hội đồng bảo an LHQ mpeh Libya.

Nuĭh rblang: Thị Đoắt