VOV4.M'nông: Ntrôl ngăch kơi ntop chuh tay nkre đah ăp trong mât kân bah nuh srê Covid-19 dôl lah ăp trong nkra dơi âk dak an ƀư tâm rnôk dja. Mỹ aƀaơ lah dak dôl geh tât khuch jru bah nuh srê Covid-19. Tổng thống Mỹ Joe Biden kuăl jă ăp nuĭh ƀon lan ngăch hăn chuh vaccine mô lah kơi ntop chuh tay vaccine. Tâm ban kơt Mỹ đŏng, ăp dak lam ntŭr neh dôl n'hao ăp trong nkra mât kân tay nuh srê. Nuĭh mât uănh nău kan Đức kuăl jă nuĭh ƀon lan lơi ir tâm mâp âk nuĭh rnôk wơt nar Noel bơi tât. Chính phủ Hàn Quốc hŏ n'glêh an nchâp đă tay ăp trong an gŭ srang ngai êng lam rêh jêng kon nuĭh tâm 1 khay n'gul. Tâm trong rƀŏng nsum, âk dak ta nkual Đông Nam Á lôch năl geh ăp nuĭh ntưp njêng săk mhe Omicron dôl tĭng ƀư lhăt mât nuh srê đŏng, tâm nê an lor nchuh n'gang ngăch./.

Nuĭh rblang: Điểu Thân