VOV4.M’nông: Hội đồng Bảo an Liên Hợp Quốc nar 24/5 ƀư tâm nchră pơk hvi mpeh “Nău kan mât đăp mpăn Liên Hợp Quốc: N'hao dăng mât đăp mpăn n'hanh rnă njrăng an nuĭh hăn kan mât kân bah tâm lơh tâm su”. Ăp dak lăp kan nsum Hội đồng Bảo an kơp dơn nkô̆ khlay bah nău mât đăp mpăn n'hanh rnă njrăng an nuĭh hăn kan mât kân bah tâm lơh tâm su, rhơn rnê nău blău ƀư mhe dâk kan n'hanh mât kân bah tâm lơh tâm su bah Tổng Thư ký Liên Hợp Quốc. Ăp dak năl lah đŏng ân ntrôl dăng nău nsrôih nsum gay nking nchăng ăp nău tât rmoh rman nuĭh kan mât kân bah tâm lơh tâm su n'hanh tâm pă nău mĭn mpeh ăp trong nkra gay n'hao dăng đăp mpăn n'hanh rnă njrăng an nuĭh hăn mât kân bah tâm lơh tâm su, kơt nău dơi rƀah gĭt nău lư, ntrŭt ntrôl ntĭm nti, dŏng công nghệ, ăp tŏng ndơ ntrŭp dŏng, tơm nuĭh kan, dak si, n'hao dăng tâm boh kan nsum lhăt đah Liên Hợp Quốc n'hanh ăp dak dơn tahen, tâm boh đah Liên Hợp Quốc n'hanh ăp mpôl kan tâm nkual, ntrŏng năl kloh nău dơn kan bah ăp mpôl đă hăn kan, uănh khlay nău tâm ton mpeh mpôl kan đah Liên Hợp Quốc n'hanh dak dơn tahen./.  

Nuĭh rblang: Điểu Thân