VOV4.Mnông-Kruanh n’gâng kan nchră nău đah dak bah dih Mỹ an gĭt, dak aơ ŭch ăp rơh tâm nchră đah Iran ta Vienna dak Áo mbra ơm geh plơ̆ tâm nchră tay ta Iran hôm ntơ lah nău nchrăp pah kan nsum lĕ rngôch (JCPOA). Ta rơh rƀŭn mbơh mhe aơ, nuĭh ntoh nău ngơi kruanh n’gâng kan nchră nău đah dak bah dih Mỹ, Ned Price an gĭt, dak aơ knơm an lah nău ngăch ndăn plơ̆ tay ăp rơh tâm nchră ta Vienna dak Áo mpeh ndâk nsơm tay nău tâm ton hạt nhân Iran lah dŭt khlăy yor ntrong kan aơ mô dơi ntoch jong. Wa Prai lah na nê̆, Mỹ lĕ geh mbơh na nê̆ dak aơ mbra plơ̆ tâm nchră tay, nkre lah răng dăng ntrong kan nchră nău đah dak bah dih hôm nha nklơi. Ăp rơh tâm nchră mpeh ndâk nsơm tâm ton hạt nhân Iran lĕ rlu kơp bâh ntơm khay 6 mhe nơh lôch rnôk Iran geh n’gâng kan mhe.

Nuĭh rblang: Thị Đoắt