VOV4.M’nông-Geh tât nău mât đăp mpăn ƀon lan ta Ukraine, tĭng ăp ntŭk kan ndơn kan Việt Nam ta Ukraine n’hanh ăp dak kiau meng, kơp tât 5 mông kêng măng nar 6/3, ăp ntŭk kan ndơn kan lĕ vơt rlău 2500 nuĭh Việt Nam lĕ ntrơn du luh nkual tâm lơh ta Ukraine. Tĭng nĕ, ăp ntŭk kan ndơn kan dak bah dih lĕ vơt rlău 1700 nuĭh ta Ba Lan, 290 nuĭh ta Hungary, klâp ma 600 nuĭh ta Rumani; rlău 40 nuĭh ta Slovakia. Ăp ntŭk kan ndơn kan Việt Nam lĕ kơl ăp nău kan n’hanh săm ƀŭt khlăy gay ma an ƀon lan lăp gŭ, hăn tât n’hanh tâm rgop đah nuĭh kan têh ta ntŭk, ăp mpôl nuĭh Việt Nam ta ntŭk kan vơt, nchrăp ndeh klư hăn nsong, ntŭk gŭ sa n’hanh pă ndơ dŏng khlăy an ƀon lan. Aƀaơ, n’gâng kan nchră nău đah dak bah dih dôl nsrôih tât tâm rgop đah ăp n’gâng kan, ntŭk kan geh tât n’hanh ăp ntŭk kan mât uănh ndeh păr nchrăp an 2 bôk ndeh păr ndơ̆ nuĭh Việt Nam n’hanh nuĭh tâm rnăk vâl sĭt dak nơm tâm ăp nar 7/3/2022 bâh Rumani n’hanh 9/3/2022 bâh Ba Lan.

Nuĭh rblang: Thị Đoắt