VOV4.M’nông- Chính phủ Ấn Độ mbra dơi nchrăp pă an doanh nghiệp dak aơ geh plơ̆ tay nău tăch an dak bah dih ba mì. Nchrăp, rnoh ba mì bơi geh ndơ̆ an duk tăch ta ăp ndrâm dak lêng bâh dak lêng klâp ma 1,2 rkeh tấn. Ntŭk kan mbơh nău mhe Reuters an gĭt nău kan aơ gay ma dơi geh tăch âk rnoh ba mì lĕ geh tâm ton kan yơn lah mô dơi tăch ta ăp ntŭk tăch rgâl yor nău ntrŭnh mô an tăch an dak bah dih bâh chính phủ rnôk khay ba năp nơh. Yơn lah, nău ntrŭnh an tăch ngluh ba mì bâh Ấn Độ hôm nha mô hŏ geh doh rklaih lĕ rnoh ndơ hôm nha khan klen ta ăp ntŭk tăch rgâl. nchroh geh, hôm nha klâp ma 500 rbăn tấn ba mì tay jêng lah ê hŏ geh joi ntŭk tăch an dak bah dih. Kơp bâh ntơm geh ntrŭnh mô an tăch an dak bah dih, Ấn Độ lĕ an tăch an dak bah dih bơi tât 470 rbăn tấn ba mì. Yơn lah hôm nha geh klâp ma 1,7 rkeh tấn tay dôl hôm nha khan ta ăp ntŭk tăch rgâl, têk nkre nău mĭn rvê lah ba mbra khuch ôm o rnôk tăch an dak bah dih yor lah khay mih dôl tât dăch.

Nuĭh rblang: Thị Đoắt