VOV4.M’nông-Lôch geh nău mbơh Thủ tướng ơm Nhật Bản Shinzo Abe khĭt geh du hê nuĭh bu klô pănh ma phao, nar 8/7 âk nuĭh leo kan lam ntur neh njoăl nău rngot klâng tât ƀon lan n’hanh rnăk vâl Thủ tướng ơm Shinzo Abe. Tổng thống Nga Vladimir Putin njoăl điện đah nău rngot klâng tât rnăk vâl wa Shinzo Abe, tâm nĕ rnê Thủ tướng  ơm Nhật Bản lah nuĭh kan chính trị dŭt blău, nuĭh lĕ geh nău ntop kơl dŭt têh an hun hao tâm boh kan đah bar dak dŭt ueh. Thủ tướng Đức Olaf Scholz an lah dŭt rngot n’hanh phĭt ndrât ngăn ta năp nău mbơh Thủ tướng ơm Abe Shinzo khĭt, nkre lah na nê̆ dak Đức tâm rnglăp đah Nhật Bản tâm rnôk nău jêr jŏt aơ. Thủ tướng Anh an gĭt  aơ lah nău du rngot ngăn. Nău dơi leo kan lam ntur neh bâh wa Abe mbra geh âk nuĭh kahgĭt tât.

Nuĭh rblang: Thị Đoắt