VOV4.M’nông – Nar 28/7, Chính phủ Australia lĕ an nchroh mbơh hao hao jêng wăng sa tâm rnôk mbơh nău ntoh hao bah dak aơ mbra rlău 7% ta dŭt năm aơ. Jâng wăng sa Australia dôl hao jêng yơn mâp mô đêt ntul rlong bah nău aƀaơ hin kơt trôk nar mô lah mô tŏng nuĭh pah kan kơt ăp nău êng kơt tâm lơh Nga-Ukraina mô lah nău tăch proăt bah trong pă manh lam ntŭr neh. Yor rĭ, Kruanh N’gâng kan Tơm prăk Australia Jim Chalmers an gĭt, ntoh hao khlay bôl mhe dơi geh âk rnôk hao tât 6,1% yơn ta dŭt năm aơ, rnoh aơ mbra hao tay tât 7,75%. Ntoh hao khlay âk, ƀư an jâng wăng sa Australia mbra mô hun hao kơt nău ŭch. Kruanh N’gâng kan tơm prăk Austalia Jim Chalmers an gĭt, jâng wăng sa dak aơ mbra dơi hao 3,75% tâm năm aơ. Tâm rnôk aơ, chính phủ Australia mbra ntêm nkrem dŏng, hao prăk khay, n’hŭch prăk dŏng njuăl kon se n’hanh prăk dak si.

Nŭih blang: Y Sưng Phê Ja