VOV4.M'nông: Bol ma njor tâp bah drô Thủ tướng Nhật Bản Shinzo Abe dơi ƀư êng, dơn geh rnăk wâl n'hanh băl mpôl dêh bên tât râng dơm. Yơn lah, ntơm bah kêng măng ngo nar ntri (11/07), hang rbăn nuĭh ƀon lan Nhật Bản hŏ hăn tât đền Zojoji ta Thủ đô Tokyo - ntŭk njor băng drô Thủ tướng Shinzo Abe gay mpơl nuih n'hâm chŭn mbah n'hanh rngot klâng đah kruanh rđău kan, nuĭh kon ntoh lư bah neh dak. Tâm rnôk nê, nău kan nkah gĭt drô Thủ tướng Shinzo Abe dơi ƀư ta âk ntŭk tam dak Nhật Bản, lơn lah ta Nara, ntŭk păng geh bu pănh khĭt. Ntơm bah nar 9/7, âk nuĭh ƀon lan Nhật Bản hŏ n'hoch jong an kao si n'hanh weh njăt ta ntŭk drô Thủ tướng Abe geh bu tăch nkhĭt hôch. Ndrel nar ntri đŏng, Thủ tướng Nhật Bản Fumio Kishida an gĭt păng mbra nsrôih tĭng ƀư nău ŭch rŏng bah drô Thủ tướng Shinzo Abe, lôch rnôk đảng Dân chủ Tự do (LDP) mât bôk geh nău dơi tâm rơh bầu cử Thượng viện nar 10/7 mhe aơ.

Nuĭh rblang: Điểu Thân