VOV4.M’nông – Nar 10/7, Thủ tướng Israel Yair Lapid lĕ geh rơh điện tâm nchră đah Tổng thống Thổ Nhĩ Kỳ Recep Tayyip Erdogan gay rgâl nău tâm boh đah 2 dak. Văn phòng Thủ tướng Israel an gĭt, ta rơh rgum nchră, kruanh 2 dak uănh lah prêh nău khlay bah rnă njrăng, wăng sa n’hanh nău đăp mpăn bah nkual Trung Đông. Tổng thống Thổ Nhĩ Kỳ mbah rhơn wa Lapid jêng Thủ tướng manh kan Israel bah bôk khay 7 n’hanh rhơn wa lôch uĕh tâm nău kan mhe. Mpeh đah nơm, Thủ tướng Lapid lĕ njuăl nău mbah rhơn, đăp mpăn n’hanh uĕh lăng di nar nsơr bah nuĭh Islam tât lam ntŭr neh nuĭh ƀon lan Thổ Nhĩ Kỳ. Tâm ăp nar bah năp, Thủ tướng Israel na nao geh ăp rơh điện tâm nchră đah ăp nuĭh kruanh A-rập Xê-út ăp nar tât. Wa Lapid mpŏng, rơh khâl bah Tổng thống Mỹ dơi rgop rgâl lơn tay nău tâm boh đah Israel n’hanh ntŭr neh A-rập.

Nŭih blang: Y Sưng Phê Ja