VOV4.M’nông-Kruanh n’gâng kan mât rnă njrăng ngih dak Australia Rích-chác Mác-lơ (Richard Marles) mbra geh rơh tât khâl 3 dak châu Âu, geh Pháp, Đức, Anh, gay ma ƀư ueh tay lơn nău tâm boh tâm kơl mât rnă njrăng ngih dak. Tĭng nău mbơh bâh wa Richard Marles, rơh tâm rkeh Nga- Ukraine ƀư n’hao nău khlăy bâh nău tâm kơl đah ăp ngih dak ndrel nsum du nău mĭn, lĕ ma ta châu âu n’hanh Ấn Độ Dương - Thái Bình Dương. Rơh tât khâl mbra geh ƀư bâh nar aơ, 29/8 tât 1/9. Tĭng nău mbơh bâh kruanh n’gâng kan mât rnă njrăng Australia, ntŭk rlu jâng ta Pháp mbra kơl ndâk nsơm n’hanh ƀư mhe nău tâm boh bar ding. Australia ntơ Pháp lah ngoăy tâm âk dak kan ndrel dŭt jŏ n’hanh geh nău dơi ngăn bâh dak aơ. Tâm nău nchrăp aơ đŏng, kruanh n’gâng kan nchră nău đah dak bah dih Australia mbra tât râng du rơh rƀŭn nchră đah ăp ndơn kan công nghiệp mât njrăng ngih dak bâh Đức n’hanh mbra tât khâl ăp ngih máy pâng duk ta Anh.

       Nuĭh rblang: Thị Đoắt