VOV4.M'nông: Ăp kruanh Mỹ an gĭt rmôt G7 dôl kuăl jă Indonesia râng tâm trong nchrăp nchâp dŏng n'glĕ an rnoh khlay pring tăch n'gluh bah Nga gay mpăng đêt sŏk geh wăng sa bah Nga bah pring xăng, tâm rnôk nê n'hŭch rnoh khlay prăk dŏng ŭnh nar an nuĭh dŏng. Yơn lah nău lư n'hanh nkoch trêng nău lư ta nkual năl lah nău ntop kơl bah Mỹ mbra "mâp jêr jŏt" ta Indonesia. Rmôt G7 ŭch rgum du mpôl tâm rgop ăp dak rvăt n'glăp ndrel dŏng 1 rnoh khlay n'glĕ dơi an đah pring kât tăch n'gluh bah Nga. Rmôt dja nchrăp mbra an dŏng nău way nchâp đă n'glĕ an rnoh khlay dŭt nkai tâm nar 5/12 tât, rnôk ăp trong rmal bah Liên minh châu Âu (EU) mpăng rvăt n'glăp pring kât bah Nga geh nău tam. Mỹ n'hanh ăp dak lăp kan nsum G7 dôl joi geh nău kơl bah du đêt dak châu Á đah nău dăn đă dja. Ŭch tĭng nău dăn đă dja dơi uănh lah nsĭt geh an Indonesia yor chính phủ dôl kơl dŭt âk prăk pring tă bah rnoh khlay pring kât hao. Yơn lah nuĭh rblang n'hanh nkoch trêng nău lư ta nkual an lah, Indonesia dŭt mĭn uănh na nê̆ tâm nău dăn đă bah G7.

Nuĭh rblang: Điểu Thân