VOV4.M’nông - Kêng ôi 24/2, Tổng thống Nga Vladimir Putin ndơn jao an ăp rmôt Nga ntơm ƀư du nău kan khlay gay mât njrăng nuĭh ƀon lan ta nkual Donbass, Ucraina. Nău mbơh bah Tổng thống Nga Vladimir Putin ndơ̆ jêh nău mbơh bah Tổng thống Ucraina an lah dak aơ dơi uănh mĭn tay trong ƀư mô hôm hạt nhân bah neh dak tĭng sam ƀŭt nkah gĭt Budapest năm 1994. Tĭng Tổng thống Putin, Nga mbra mô an nău geh kơt nĕ. Pơng lah, ăp rmôt tahen Nga mô geh ndra ŭch in Ucraina. Yơn lah, Nga mbra mât njrăng êng lah ŭch. Tổng thống Nga mbơh đŏng đah soan dăng tahen bah Nga, lah rjăp dak Nga rgâl mhe, n’ăp jêh rnôk Liên Xô tŭp n’glưh n’hanh roh du gâl nău geh hạt nhân, yơn hôm e ngoăy tâm âk dak hạt nhân dăng ngăn, đah nău dơi têh tâm du đêt ntil ndrăk nsiu mhe ngăn. Yor nê ăp nău rdôl lơh nchrŏng tâm dak Nga mbra jêng tât mô dơi n’hanh geh nău khuch hô.

Jêh rnôk ntoh ngơi bah wa Putin, tơm nău mhe Ucraina Pravda ndơ̆ nău du hê kruanh Bộ Nội vụ Ucraina an gĭt, ăp ntŭk ntĭm rđău tahen bah Ucraina ta thủ đô Kiev n’hanh nkual ƀon têh Kharkiv lĕ geh rdôl lơh đah ăp rơh pănh grăp phao ŭnh. Ăp nuĭh an saơ ta thủ đô Kiev an gĭt lĕ tăng du rơh rtoh jêh rnôk Nga mbơh rgŏ jă nău ƀư tahen nchrŏng tâm dak Ucraina. 

Nuĭh rblang: Y Sưng Phê Ja