VOV4.M’nông- Tĭng nău nchrăp, nar naơ 22/7 ta nkuăl ƀon têh Istalbul, Thổ Nhĩ Kỳ, ndơn kan bâh Nga n’hanh Ukraine ký du nău tâm ton gay ma pơk tay ăp ndrâm dak lêng bâh Ukraine ta dak lêng Biển Đen, kơl an nău kan tăch ndơ sa an dak bah dih, đah nău tât râng bâh Tổng thư ký LHQ Antonio Guteres n’hanh Tổng thống dak tơm jay Tayip Ecdogan. Nău tâm ton mbra geh nkô̆ nău mpeh ndrel uănh năl tay drăp ndơ ta ăp ndrâm dak lêng bâh Ukraine. N’hanh Thổ Nhĩ Kỳ mbra njêng du ntŭk kan mât pă kan đah Ukraine, Nga n’hanh Liên hợp quốc gay ma leo mbơh nău tăch ndơ sa an dak bah dih. Nhcrăp, nău kan tăch ndơ sa an dak bah dih mbra dơi plơ̆ tay bâh 3 ndrâm dak lêng bâh Ukraine ta dak lêng Biển Đen geh Odessa, Pivdennyi n’hanh Chornonmorsk. Mpeh đah nău dơi bâh Nga, dak aơ mbra geh Mỹ n’hanh âk dak châu kân kan ndrel ƀư lhoi nău rmal. Tĭng nău mbơh bâh nuĭh ntoh nău ngơi n’gâng kan nchră nău đah dak bah dih Nga Maria Zakharova, ndơ sa n’hanh phân poh bâh Nga an geh gĭt dăch tay đah ntŭk tăch rgâl ma mô geh mâp ăp nău jêr êng, gay ma mât đăp mpăn rnă njrăng ndơ sông sa an lam ntur neh.

Nuĭh rblang: Thị Đoắt