VOV4.M’nông- Kruanh n’gâng kan nchră nău đah dak bah dih Nhật Bản Ha-ya-shi (Hayashi) mhe geh rơh tâm mâp đah kruanh n’gâng kan nchră nău đah dak bah dih Hàn Quốc Părk Jin ta thủ đô Tokyo, tâm nĕ 2 ding lĕ tâm ban ŭch ntrôl nău tâm kơl ta âk nău kan gay ma rgâl mhe ueh nău tâm boh kan bar ding ơm lĕ ta rnoh mô ueh tâm âk năm mhe nơh. Ta rơh tâm mâp, bar kruanh n’gâng kan nchră nău đah dak bah dih tâm ban ŭch tâm kơl Nhật Bản- Hàn Quốc, Nhật Bản-Mỹ-Hàn dôl ta rơh dŭt khlăy lơn tâm rnôk nău kan mhe aƀaơ. Rlău ma nĕ, bar hê kruanh n’gâng kan nchră nău đah dak bah dih lah na nê̆ mbra tâm kơl tay lơn tâm nău rdâng đah Triểu Tiên geh nđâp ma nău ƀon lan Nhật Bản geh nhup tâm kăl e nơh. Tĭng nău mbơh bâh kruanh n’gâng kan nchră nău đah dak bah dih Nhật Bản Hayashi, nău tâm boh Nhật Bản- Hàn Quốc an geh hun hao knơm ta nău tâm rnglăp n’hanh tâm kơl đah 2 dak lĕ geh rdâk njêng kơp bâh ntơm geh ueh kơt ơm nău tâm boh kan đah dak bah dih năm 1965 n’hanh gay ma dơi geh nkô̆ mpŏng kan nĕ, 2 dak an geh doh rklaih ăp nău hôm nha kŏ khan, geh nđâp ma nău nuĭh pah kan bâh gôl dak Triều Tiên ntơm nơh.

Nuĭh rblang: Thị Đoắt