VOV4.M’nông- Nar 27/7, ta rơh tât khâl ngăn dak Nhật Bản, Tổng thống  Indonesia Joko Widodo lĕ geh rơh tâm nchră đah Thủ tướng Kishida Fumio. Bar hê nuĭh leo kan lah na nê̆ mbra n’hao nău tâm kơl ta âk trong kan khlăy gay ma mpŏng tât kahgĭt 65 năm nar njêng tam boh kan nchră nău đah dak bah dih đah Nhật Bản n’hanh Indonesia n’hanh kahgĭt 50 năm nău tâm boh tâm rnglăp n’hanh tâm kơl Nhật Bản- ASEAN ta năm tât tay. Mpeh đah nău tâm boh kan bar ding, bar hê nuĭh leo kan lah na nê̆ mbra geh ntrôl tay tâm kơl rnă njrăng, dak lêng n’hanh tâm mbơh rnă njrăng ngih dak. Tâm nĕ, Thủ tướng Kishida Fumio lĕ mpơl nău ŭch kơl an ueh tay lơn gay ma n’hao nău dơi mât kơh dak lêng an Indonesia. Nkre lah mpôl kan mât rnă njrăng Nhật Bản mbra geh rơh bôk năp tât râng rơh nti tahen nsum âk ding “ Ndơ nking Garuda” mbra geh ƀư ta Indonesia ta khay tât tay.

Nuĭh rblang: Thị Đoắt