VOV4.M'nông: Nar 17/8, Nuĭh đă hăn kan mhe êng Liên hợp quốc mpeh Myanmar Noeleen Heyzer hŏ mâp kruanh n'gâng kan tahen Myanmar wa Min Aung Hlain nkhêp geh hăn khâl 2 nar tât dak dja. Tâm nău mbơh lôch jêh hăn khâl, wa bu ur Heyzer an gĭt păng hŏ geh rơh tâm ôp sŏng dăng đah nuĭh mât  bôk n'gâng kan tahen Myanmar, Thống tướng Min Aung Hlaing. Tâm rơh mâp, păng hŏ nkoch nău klach rvê bah Tổng thư ký Liên hợp quốc mpeh nô nău Myanmar, lơn lah rơh duh jêr chính trị, rnă njrăng n'hanh kơl nuĭh ta dak dja; dăn đă mpeh Myanmar kan nsum, nta trong dơh an trong tât kơl nuĭh. Wa Heyzer hŏ kuăl jă n'gâng kan tahen Myanmar nsrôih tĭng ƀư ăp trong nking nchăng bah tâm lơh đŏng; ton ŭch tĭng ăp trong tâm nchră, geh nău tam đah ăp ding geh tât gay joi trong nkra an đăp mpăn n'hanh geh nău tâm ban ta Myanmar./.

Nuĭh rblang: Điểu Thân