VOV4.M’nông – Ntoh ngơi ta rơh rƀŭn lĕ rngôch bah Ủy ban thống nhất nchră nău bah Quốc hội Hàn Quốc nar 28/3, Kruanh nchră nău dak aơ wa Chung Eui-yong an gĭt, Hàn Quốc n’hanh Mỹ dơi ƀư rơh tâm mâp gưl prêh Hàn-Mỹ tâm khay 5 tât. Wa Chung Eui-yong mĭn lah, mpeh Mỹ dŭt ŭch tâm rơh mâp đah Tổng thống Joe Biden đah Tổng thống mhe Hàn Quốc Yoon Suk-yeol. Aƀaơ, n’gâng kan nchră nău n’hanh Ủy ban jao an n’gâng kan dôl tâm nchră rjăp mpeh nău aơ. Tâm nĕ, jêh rnôk wa Yoon Suk-yeol dăng tâm rơh săch Tổng thống Hàn Quốc, Tổng thống Mỹ Joe Biden lĕ kuăl điện mbah rhơn. Tĭng nău nchrăp, ƀư dơn kan bah Tổng thống mhe Hàn Quốc mbra ƀư tâm nar 10/5.

Nuĭh rblang: Y Sưng Phê Ja