VOV4.M’nông: Liên hợp quốc lơ 1/3 mbơh, rlau 660 rbăn nŭih hăn du der bah Ucraine hŏ nchrăt hăn tât ăp dak êp nê, kơp ntơm rnôk Tổng thống Nga Vladimir Putin rgŏ jă nau tâm lơh tâm lơ 24/2 mhr rlau. Tâm lam nkuăl neh Châu Âu, rđau kan hŏ ndâk ăp ntŭk ƀư ndơn nŭih ndrel đah nthưp, ntŭk ma khân păng dơi ndơn nau kơl an mpeh dak si ndrel rklaih kơl săm ƀŭt ân nŭih du der. Ma rbăn nŭih hăn kơl an hŏ tât nkuăl n’har bri gay ma rgop ndơ sa, phôi ntâk ndrel kho a. Âk ngăn nŭih du der hŏ hăn tât ăp dak Liên minh Châu Âu ntơm nkuăl n’har bri mpeh ba dâng Ba Lan, Slo-va-kia ndrel Hung-ga-ry ndrel mpeh ba dâng ngăn bah Ru-ma-ni. Ba Lan geh âk nŭih Ucraine têh ngăn (nklăp du rkeh nŭih) hŏ ndơn âk nŭih mhe tât. N’gâng kan Ba Lan nchrăp geh 400 rbăn nŭih hŏ lăp tă bah Ucraine./.

Nŭih rblang: H’Thi