VOV4.M'nông: Đại hội đồng Liên hợp quốc ƀư rơh hop ndal tâl 11 ntơm bah nar 28/02 tât nar 02/03 gay tâm nchră mpeh nô nău Ukraine. Râng n'hanh geh nău rgop lah Tổng Thư ký Liên hợp quốc An-tô-ni-ô Gu-tê-rết (António Guterres), Kruanh Đại hội đồng Liên hợp quốc Áp-đu-la Sa-hít (Abdulla Shahid) n'hanh ntơh măt rlău 100 dak, mpôl kan tâm nkual. Tổng Thư ký LHQ An-tô-ni-ô Gu-tê-rết kuăl jă dŭt bah nău tâm lơh, uănh khlay mât njrăng ƀon lan ngăn n'hanh uănh khlay luật kơl nuĭh dak bah dih. Kruanh Đại hội đồng Liên hợp quốc Áp-đu-la Sa-hít kuăl jă ăp ding rlu pănh, plơ̆ tay tâm nchră n'hanh joi trong nkra tâm boh. Ăp dak lăp kan nsum Liên hợp quốc an lah ân ơm nthoi tay tâm nchră, der bah jêng lơn ma duh jêr, uănh khlay joi trong nkra đăp mpăn gay nkra bah tâm lơh nsing kalơ uănh khlay ăp nău way ơm bah luật pháp dak bah dih n'hanh Hiến chương Liên hợp quốc, lơn lah nău way mpeh ƀư tơm n'hanh lam lĕ rngôch neh dak./.

Nuĭh rblang: Điểu Thân