VOV4.M'nông: Nar 13/7, ta nkual ƀon têh Nam Ninh, Quảng Tây, Trung Quốc, Ủy viên Bộ Chính trị, Groi Thủ tướng Rnâng kan Chính phủ Phạm Bình Minh hŏ ndrel Ủy viên Quốc vụ, Bộ trưởng Bộ Ngoại giao Trung Quốc Vương Nghị ndrel ƀư tơm rơh hop tâl 14 Ủy ban rđău đă tâm boh bar ding Việt Nam - Trung Quốc.

Ta rơh hop, bar ding tâm ban ŭch ntrŭt ntrôl ăp trong hăn khâl, tâm mâp gưl têh n'hanh ăp gưl; an ƀư geh nău tam tâm boh đah bar Đảng; Mât uĕh nău khlay bah Ủy ban rđău đă tâm boh bar ding Việt Nam - Trung Quốc. Ntrŭt ntrôl ăp trong kan tâm boh ngăn ngăn đah bar dak hun hao tay đăp mpăn, geh nău tâm ban, jŏ jong, n'hao dăng tâm nđŭr tâm rnglăp đah ƀon lan bar dak. Mpeh n'har bri neh dak, bar ding tâm ban ŭch kan nsum mât njrăng uĕh n'har bri ta neh kơh, nkra tâm di ăp nău ntoh luh tĭng 03 si ƀŭt tâm di mpeh n'har bri neh kơh Việt Nam - Trung Quốc. Bar ding tâm ban ŭch tĭng jăp tay nău mĭn nsum gưl têh  mpeh nău mât đăp mpăn ta dak lêng./.

       Nuĭh rblang: Điểu Thân