VOV4.M’nông: Lơ 22/7, ta Istanbul, Thổ Nhĩ Kỳ, ăp ntoh măt bah Nga, Thổ Nhĩ Kỳ, Ukriane ndrel Liên hợp quốc hŏ kí nau nchrăp mpeh nau tăch luh ndơ tuch tăm. Tĭng nê, nau kan nchuăn rdeng ndơ tuch tăm bah Ukraine tă bah ăp mpông dak lêng Biển Đen geh đăp mpăn ndrel nau tăch luh ndơ tuch tăm bah Nga geh jăng lơi nau nchueng. Nau nchrăp kŏ ntrŭnh lah, nau tăch luh ndơ tuch tăm bah Ukraine bah Biển Đen mra geh ƀư tâm 3 mpông dak lêng: Odessa, Chornomorrsk ndrel Piadennip. Tâm ăp mpông dak lêng, ntoh măt bah Liên hợp quốc, Thổ Nhĩ Kỳ ndrel Ukraine mra uănh n’hêl nau nchuăn jur ndơ. Ăp nau tât khuch kŏ mra geh yor ntŭk kan nsum kơl rklaih. Nau nchrăp aơ mra geh nau tam tâm 120 nar, jêh nê mra dơi ntop tay nar. Nar rƀŭn geh nau râng bah Tổng thư ký Liên hợp quốc Antonio Guterres, Tổng thống Thổ Nhĩ Kỳ Recep Tayyip Erdogan, Kruanh n’gâng kan neh dak Nga Sergei Shoigu ndrel Kruanh n’gâng kan ntŭk ntu gung trong Ukraine Aleksander Kubrakov./.

Nŭih rblang: H’Thi