VOV4.M’nông- Tổng thống Thổ Nhĩ Kỳ Recep Tayyip Erdogan mhe geh mbra mô an Phần Lan n’hanh Thụy Điển lăp kan ndrel ta NATO lôch bar dak  mbơh nuĭh săch kan. Wa Erdogan an lah ăp ngih dak ta Bắc Âu dôl kơl an đah mpôl kan bâh Đảng công nhân nuĭh Cuốc PKK ta Syria ma Ankara pă dăp ta rmôt ƀư rlăng. Tổng thống Thổ Nhĩ Kỳ lĕ ntêt nkri mbra njrăng nău lăp kan ndrel NATO bâh 2 ngih dak aơ. Thổ Nhĩ Kỳ nchŭt dôih an Thụy Điển n’hanh Phần Lan lĕ mô ŭch tĭng nău đă leo kan ăp nuĭh ma khân păng ntôn lah nuĭh kan ndrel bâh ntŭk kan ƀư rlăng. N’gâng kan Tư pháp Thổ Nhĩ Kỳ an gĭt mô geh nău đă mbơh leo êng geh ƀư tâm 33 nău đă ma Ankara njoăl tât Stockholm mô lah Helsinki tâm 5 năm ba năp. Thổ Nhĩ Kỳ nduĭh Thụy Điển yor lĕ rlu ăp nău kan tăch rvăt phao blêu đah dak aơ kơp bâh năm 2019 gay ma plơng lơh tay nău kan bâh Thổ Nhĩ Kỳ ta mpeh ba lơ Syria.

Nuĭh rblang: Thị Đoắt