VOV4.M’nông – Geh nău dun hô bah lĕ rngôch ăp nuĭh tâm chính phủ kơt âk nghị sĩ đảng Bảo thủ, Thủ tướng Anh Boris Johnson măng nar 7/7, lĕ na nê̆ mbơh rlu kan tâm nău ntoh ngơi ta bah dih jay mrô 10 nkual ƀon têh Downing. Yơn lah, tĭng BBC, pơng hôm e mât ƀư Thủ tướng manh kan an tât rnôk đảng Bảo thủ săch geh kruanh mhe tâm yan aơ. Tâm nău ngơi rlu kan đêt ngăch, wa Boris Johnson lĕ nkoch lah uĕh đah rnăk wâl yor lĕ rlet rlău ăp nău jêr jŏt đah pơng. Pơng lah uĕh ăp nuĭh Chính phủ lĕ hăn ndrel đah pơng, ăp nuĭh ƀon lan dak Anh lĕ nsing nơm jao an pơng ntĭm rđău neh dak. Pơng djôt dơn tâm đêt nar bah năp, pơng lĕ nsrôih bônh ăp nuĭh kan ndrel bah pơng yơn dŭt yô̆ mô dơi. Thủ tướng Boris Johnson ton mbra kơl nuĭh kruanh mhe bah Anh, lah uĕh i ur Carrie n’hanh ăp kon lĕ kơl pơng n’hanh lah uĕh lĕ rngôch ƀon lan lĕ “an nău kan têh khlay an pơng”.

Nŭih blang: Y Sưng Phê Ja