VOV4.M’nông: Tâm nau ton lah geh ndŏ luh bah năp rơh hăn khâl Qatar, Thủ tướng Pakistan Shahbaz Sharif ŭch, mra njêng nau kan tăch rgâl ndrel ntuh kơl tâm nau kan ŭnh nar ndâk mhe, nau đăp mpăn ndơ sa, hun hao công nghiệp, ngih vâl gung trong, pala n’aih ndrel nau kan ntŭk gŭ rlu ân ăp dak Trung Đông. Rơh khala bah Thủ tướng Pakistan geh bah năp rơh rƀŭn bah Tơm prăk Lam ntur neh tâm pơh ba kơi, nchrăp mra nchră ân manh 1,2 rmen đôla Mỹ ân Qatar. Neh dak Nam Á aơ dôl ma tŭp tâm nau kan mô ueh mpeh văng sa yor nau rŭng răng bah ntrong trok tâm, nau hao khlay ndơ bơi tât 25%. Thủ tướng Pakistan mô mbơh n’hêl mpeh nau kan bah rơh rƀŭn, yơn tĭng nau mbơh, păng mra tât mbơh nau tăch cổ phần bah Qatar tâm ăp ntŭk kan bah Ngih dak, nkre ŭch joi ntrong kan trok mbrơi tĭng ăp nau nchrăp jong năm./.

Nŭih rblang: H’Thi