VOV4.M'nông-Tổng thống Hàn Quốc I-un Sớc-yên (Yoon Suk-yeol) nar 25/8 geh nău đă mbơh ăp nău nchrăp pah kan bâh tahen gay ma doh rklaih ăp nău ntêt nkri mpeh hạt nhân n‘hanh grăp phao ŭnh ăp nar lơ ma hao bâh Triều Tiên. Tổng thống Hàn Quốc lĕ geh ndơ̆ mbơh nău nchŏng đă aơ tâm rơh tât khâk bôk năp bâh păng tât du boong ke tahen ta thủ đô Seoul, ntŭk mbra geh nău kan lah ntŭk leo kan lah geh nău tâm lơh. Rơh tât khâl bâh Tổng thống lĕ tâm ban đah rơh ntơm nti nău kan nsum tahen dŭt têh tâm âk năm đah ăp mpôl tahen Hàn Quốc n’hanh Mỹ. rơh nti tahen ăp năm ndơ nking nău đăp mpăn Un chi (Ulchi Freedom Shield) dôl geh ƀư n’hanh mbra lôch ta nar 1/9 tay. Tĭng Tổng thống I un Sớc yên, ăp rơh nti tahen năm aơ geh ƀư tĭng du nău lĕ nchrăp kan rgâl n’hanh ăp nău nchrăp kan an geh tâm rdâng dơi ăp nău ntêt nkri ăp nar lơ ma hao bâh Triều Tiên.

       Nuĭh rblang: Thị Đoắt