VOV4.Mnông- Tĭng nău mbơh bâh hãng thông tấn CNN bâh Mỹ, groi kruanh n’gâng kan Nội vụ Ukraine Evgeny Yenin an gĭt, rơh tâm nchră ta ôi nar 28/2 tĭng mông ta ntŭk. Ta năp nĕ, ntŭk kan Tổng thống Ukraine Volodymyr Zelensky mbơh, nar 27/2, Tổng thống Belarus Aleksander Lukashenko lĕ kuăl điện an Tổng thống Zelensky n’hanh dơn ngoăy ăp nău geh tât rơh tâm nchră Nga- Ukraine. Ta rơh tâm nchră, Tổng thống Belarus Aleksander Lukashenko lĕ dơn nău kan mât đăp mpăn an lah, lĕ rngôch ăp bôk ndeh păr, ndeh păr kung n’hanh grăp phao ŭnh ta nkual neh Belarus mbra mô geh dŏng tâm rnôk tâm nchră n’hanh lĕ rngôch rơh hăn bâh mpôl kan Ukraine. Ntoh ngơi đah báo chí, kruanh n’gâng kan nchră nău dak bah dih Ukraine Dmytro Kuleba an lah, rơh tâm nchră Ukraine-Nga mô geh nău dơi hăn lor bôk năp lah du nău dơi têh.

Nuĭh rblang: Thị Đoắt