Di nkah nar tahen sôt rmanh, tahen khĭt, tâm lam dak geh âk nau kan ôp khâl, pă nklâm ndơ ân nŭih geh dơi kơl, rnăk geh n’hâm ma cách mạng. Ôi lơ 26/7, Trung tướng Thái Đại Ngọc, Tư lệnh Quân khu 5 ndrel rmôt hăn kan bah Quân khu 5 hŏ tât khâl, pă ndơ ân rnăk Mẹ Việt Nam janh dăng, rnăk dơi kơl, tahen sôt rmanh tâm Quận Cẩm Lệ ndrel Hoà Vang, nkuăl ƀon têh Đà Nẵng. Ntoh măt cán bộ, tahen Quân khu 5, Trung tướng Thái Đại Ngọc ntoh nau nkah tât Mẹ Việt Nam janh dăng, tahen sôt rmanh, rnăk geh n’hâm hŏ mô nghoach nting mham ân nau tâm lơh cách mạng, đăp mpăn neh dak. Tâm Quân khu 5, rlau 180 rbăn tahen khĭt, 176 rbăn tahen sôt rmanh hŏ roh nting mham tâm 2 nau tâm lơh mprơh Pháp, mprơh Mỹ. Rnôk aơ, Quân khu 5 lŏ đă 3 rmôt hăn rgum joi môch, nting tâm 2 dak băl Lào ndrel Campuchia.

Ntŭk rgum ntrŭt nsôr tuch tăm gưl neh dak mhe tât khâl, pă nklâm ndơ an nuĭh rnoi mpôl đê̆ geh n’hâm suan đah cách mạng ta xã Quảng Nhân, nkuâl A Lưới, Thừa Thiên Huế. Ta thôn Pi Ân 2, mpôl hăn hŏ tât khâl n’hanh pă nklâm ndơ an u Kăn Nghĩah (97 năm deh) nuĭh Pa Cô. U Kăn Nghĩah hŏ geh âk nău rgop tâm bar rơh tâm lơh tâm su kơl neh dak. Ta  thôn Pi Ân 2, Mpôl hăn hŏ tât khâl  n’hanh pă nklâm ndơ an u Kăn Cần (92 năm). U Cần nuĭh Pa Cô mpeh săk nuĭh dơi kơl, geh n’hâm suan đah cách mạng nkre lah rnăk ach o bah xã Quảng Nhâm, nkuâl A Lưới.

Tâm nkuăl Tây Nguyên, kŏ geh âk nau kan hăn kơl an đŏng, ntoh nau “Ngêt dak nkah gĭt tu”. Tâm nkuăl Đăk Glei, n’gor Kon Tum, Công ty Điện lực Kon Tum ƀư nau ntơm sa nkra ndrel jao 6 ngih kơl an an ndrel âk nklâm ndơ ân ăp rnăk vâl ach o, rnoi mpôl đê̆ geh nau rêh jêr jŏt, rnăk geh nau dơi kơl, nŭih geh n’hâm ma cách mạng tâm 2 xã Mường Hoong ndrel Ngọc Linh. Tâm xã n’har bri Ia Rvê, nkuăl Ea Súp, N’gâng kan rđau tahen Biên phòng n’gor Dak Lak kŏ mhe tâm rgop ma ăp mrôt kan ƀư nau ntơm leo dŏng ndrel jao “Ngih kơl an tâm rnglăp tahen ƀon lan” ân rnăk wâl wa Phan Thanh Sang. Ngih khlay 210 rkeh. Tâm nê, 100 rkeh prăk yor cán bộ, tahen ăp mrôt kan tâm rgop, rnoh prăk hôm e lah yor rnăk vâl, băl mpôl rgop êng, cán bộ, tahen Đồn Biên phòng Ia Rvê kơl an nar hăn ndâk nkra ngih./.