Tâm nchră mpeh bôk nau nchrăp Luật neh ntu (rgâl nkra), wa Lê Thị Song An, rmôt kan Long An đă uănh nau rhuăt gleh nar mbơh nau sŏk lơi neh. Yor nau ntrŭnh mbơh ân nŭih geh neh bu sŏk lơn, tơm drăp ndơ geh nsum ma neh, nŭih geh nau dơi ndrel nau ƀư geh tât mbrơi ngăn lah 90 nar đah neh tuch tăm ndrel 180 nar đah neh ƀư nau kan êng lah mô tâm di:

‘Nar mbơh ba lơ lah jong ir, tâm rnôk nkô̆ nau mbơh sŏk lơi neh lah ân nŭih dŏng neh gĭt nau dơi dŏng neh bah nơm mra geh bu sŏk lơi gay ma ƀư ntŭk kan, nau kan êng. Nau ƀư ntoch jong tay nar mbơh sŏk lơi mô geh nau tam gay ma ƀon lan dŏng neh tâm di ma nau ntrŭnh sŏk lơi. Mra lah 45 nar đah n’ăp ma neh tuch tăm ndrel geh ƀư nau kan êng"”

Hôm tĭng wa Mai Văn Hải, rmôt kan bah n’gor Thanh Hoá, mô dơi ntrŭnh nau rƀŏng đah ăp nau rgum dŏng neh gưl nkuăl gay mât đăp mpăn nau tâm ban ma Luật rgum nsum. Nkre đă ân ƀư kloh nau gay ma năl nau rƀŏng uănh đah nau ntrŭnh dŏng neh:

‘Nau rgum nsing tâm nau nchrăp hun hao văng sa rêh jêng, yơn nau rƀŏng tâm nau dŏng neh ri hôm ê saơ kloh, ƀư jêng nau thơ tha, mô geh nau nsing rjăp. Nkŏ nau năl nau ŭch dŏng neh gưl nkual, gưl xã tâm nau rgum gưl n’gor ân geh dơi ƀư n’hêl lơn đŏng, ngăn lah mpeh neh tuch tăm, neh mât rong, neh ndâk ngih vâl gung trong”...

Wa Sùng A Lềnh, rmôt kan bah n’gor Lào Cai lah rjăp, bah nau mêt uănh tâm nkuăl ân saơ nau ntrŭnh nau kan bah Ngih dak ê kloh tâm nau ngăn dôl geh nau ƀon lan ŭch ntrơn nkô̆ nau, pă săm ƀŭt kơp dơn dŏng neh, geh nau đă ri ntŭk kan Ngih dak mơ ƀư. Wa Sùng A Lềnh mbơh, aơ lah nau ê dơi bah Luật, ƀư geh nau phong lah mô ueh, kơt lah geh nau dơi dăn-ân, ƀư jêng sa khâm geh tâm nkual, ngăn lah tâm dâng geh nau ndăn nau kan nsum gay ma ƀư nau kan êng gay ma  geh sa ân săk nơm. Păng đă ân geh ntop tay nau kan bah ntŭk kan Ngih dak đah nau dŏng neh tâm nkoch trêng, bonh đă, ntĭm mbơh, kơl an nŭih ƀon lan dŏng neh ƀư ăp nau kan mpeh neh, đăp mpăn nau geh dơi bah Ngih dak, nŭih ƀon lan ndrel njrăng rdâng nau khuch, nau tih pháp luật mpeh neh ntu.

            Ăp ntoh măt kŏ ân lah, nau sŏk lơi neh yor tih pháp luật mpeh ntuh ntu kơt nau nchrăp luật ê kloh, ân geh mĭn, kơp gay ma ntrŭnh rjăp lơn. Wa Nguyễn Đại Thắng, rmôt kan bah Hưng Yên đă ƀư kloh nau dŏng neh bah ăp bôk nau kan đô thị, nau kan tăch rgâl gay ma sŏk lơi:

 ‘Ăp bôk nau kan đô thị, bôk nau kan tăch rgâl đah nau dŏng neh ntơm 100 ha hao gŏ lơ jao gay Ngih dak sŏk lơi neh yơn mô dơi ƀư nau tâm nchrăp. Lah ƀư dơi ăp nau nchrăp ri ân geh ntrong kan mât nkân nau nchrăp kan aơ. Ngih dak geh nau kan mât đăp mpăn nau dơi geh jêng tâm nau rêh ndrel nau dơi văng sa ân nŭih ƀon lan rnôk geh sŏk lơi neh. Yơn lah nŭih ƀon lan ân geh nau dơi pă neh ân ăp bôk nau kan kơl an hun hao văng sa, rêh jêng, mât đăp mpăn neh dak, rnă njrăng bah neh dak”.

Ta rơh rƀŭn, Groi Thủ tướng Chính phủ, Kruanh n’gâng kan ntŭk ntu gŭ âm Trần Hồng Hà mbơh, rơh rlau aơ, nau ƀư sŏk nau rgop bah ƀon lan geh ntrŭnh ƀư rjăp, ƀon lan ƀư tơm, khoa học, đăp mpăn nau kan ngăn ndrel săk tam đah âk nau kan ăp ntil, ngăn ngên jêng nau rƀŭn rgum chính trị jru, hvi, nau kan chính trị-pháp lý khlay. Hŏ geh bơi tât 11 rkeh 700 rbăn tŏ nau rgop mbơh tâm nau nchrăp Luật. Ăp nau rgop rgum nau kan trok tâm, kơl an, ndâk ntŭk mhe, jao neh, ân manh neh, jao nau dơi dŏng neh ndrel tơm prăk neh ntu, rnoh neh...Chính phủ hŏ geh nau ntrŭnh đă ƀon lan lŏ rgop đah ăp ntŭk kan nkra ân tât rnôk luật geh Quốc hội nchră, gay lŏ ƀư ân tŏng, nâp nâl lơn.

 Mbơh nau bah N’gâng kan Ntŭk ntu gŭ âm kŏ ân gĭt, mpeh nau sŏk lơi neh gay hun hao văng sa, rêh jêng, rgop nau, ntŭk kan nchrăp nkra hŏ ntơm ntrơn nkra ăp nkô̆ nau bah Điều 75 tĭng trong Ngih dak sŏk lơi neh gay ƀư ăp nau kan hun hao văng sa, rêh jêng yor nau geh dơi bah neh dak, nsum mpôl gay ƀư ueh tu tơm neh ntu, n’hao nau dơi săk tam tâm nau dŏng neh, hun hao ntŭk ntu văng sa rêh jêng tĭng nau mhe, ƀư nau kan kơl an tâm nau rêh jêng, mât ntŭk ntu gŭ âm ndrel mât ăp nau ueh lơn mpeh văn hoá./.