Ta n'gor Thái Nguyên geh 51 rnoi mpôl đê̆, âk bơi 30% rnoh nuĭh lam n'gor. Ăp năm rlău aơ, ndrel đah ăp trong kơl ƀon lan rnoi mpôl đê̆ tă bah Trung ương n'gluh an, n'gor Thái Nguyên lah ngoăy tâm ăp n'gor ơm rdâk njêng n'hanh geh âk trong kơl mha êng an ƀon lan rnoi mpôl đê̆ mpeh yôk yang. Bah nê gay hun hao wăng sa, rêh jêng kon nuĭh rhuăt dăch bah tâm ƀah đah ƀon lan rnoi mpôl đê̆ nkual jru, nkual ngai đah ăp nkual êng ƀa ƀă tâm n'gor.

Kêng dŭt năm 2020 bơi 50 rnăk xóm Cao Biền, xã Phú Thượng, nkuâl Võ Nhai mơ geh trong rse điện neh dak. Cao Biền lah xóm n'glĕ dŭt tâm n'gor jut bah dơi mô geh điện. Nău dja hŏ an saơ nău geh tam bah trong pă an điện ƀon lan n'gor Thái Nguyên, lvang năm 2016-2020. Yuh Triệu Thị Sinh, xóm Cao Biền, xã Phú Thượng, nkuâl Võ Nhai, mpơl nău:

Ntơm nơh dŏng thủy điện jê̆ gay mpoh ang dơm mô dơi dŏng tủ lạnh. Ntơm bah rnôk geh điện saơ rhơn ngăn, rvăt năp tủ lạnh gay tâl prăp ndơ sa dĭl.

Wa Triệu Phúc Tiến, Kruanh xóm Cao Biền, xã Phú Thượng, nkuâl Võ Nhai, nkoch:

Dơi Đảng, Ngih dak têk điện sĭt xóm Cao Biền mpôl hên dŭt rhơn nđơr ngăn. Aơ lah nău wơl geh bar pe jât năm bah nuĭh ƀon lan ta ntŭk dja.

Mô dơn geh điện, âk trong kơl an ƀon lan rnoi mpôl đê̆ mha êng ƀa ƀă dơi n'gor Thái Nguyên rdâk njêng n'hanh an ƀư đŏng kơt: Trong ntop kơl boh I ốt njrăng, n'gang tŭl ko, mô ngăch bôk rngok; Bôk nău kan hun hao wăng sa, rêh jêng kon nuĭh nkual ATK n'hanh nkual ƀon lan rnoi mpôl đê̆ jêr jŏt mha êng ƀa ƀă. Đề án Mât ndray, hun hao văn hóa ăp ƀon lan rnoi mpôl đê̆ n'gor Thái Nguyên tât năm 2020... wa Lý Văn Mùa, Bí thư Chi bộ xóm Lũng Luông, xã Thượng Nung, nkuâl Võ Nhai, uănh năl:

Ma ăp bôk nău kan hŏ kơl kônh wa klaih rlău ach o,, nta trong dơh kơl kônh wa hun hao wăng sa, tâm ban kơt rdâk njêng ăp rup uĕh văn hóa bah kônh wa, ƀon lan đŏng.

        Mhe aơ, n'glêh an mbrô 39 bah UBND n'gor Thái Nguyên “Quy định nkual njêng tơm cán bộ an ăp ƀon lan rnoi mpôl đê̆ mpeh săk dơi sơch lăp tâm ăp nhih nti phổ thông dân tộc nội trú ta ntŭk", lah du trong kơl mha êng đŏng, hŏ ngăch droh rklaih jêr jŏt rnôk quy định mhe du đêt xã, thôn ƀon mpeh săk jêr jŏt mha êng geh huêt dăch. Wa Nguyễn Thái Nam, Groi Kruanh Ban Dân vận Tỉnh ủy, Kruanh Ban Dân tộc ơm n'gor Thái Nguyên, an gĭt:

 Đại hội Đảng bộ n'gor Thái Nguyên geh rnoh tât kan khlay, nsrôih 8% oh kon ƀon lan rnoi mpôl đê̆ dơi nti ta ăp nhih nti dân tộc nội trú. N'gluh an nău n'glêh an mbrô 39 n'gâng kan ntĭm nti n'gor Thái Nguyên hŏ sơch lăp tŏng rnoh kon se nti.

 Lah kơt năm 2016, n'gor Thái Nguyên hôm 48 xã dŭt jêr jŏt mha êng tât năm 2021, dơn hôm 14 xã (hŭch 70%), rnoh âk rnăk ach o nkual ƀon lan rnoi mpôl đê̆ n'hanh mpeh yôk yang rĭng hŭch 3% ăp năm. Tât lĕ năm 2021, lam n'gor Thái Nguyên geh 73/100 xã nkual ƀon lan rnoi mpôl đê̆ n'hanh mpeh yôk yang tât di rnoh rdâk njêng ƀon lan mhe, âk rlău 3 tơ̆ rĭng geh nsum lam dak. Ăp rnoh nkah uĕh dja an saơ nău nsĭt geh bah ăp trong kơl mha êng ƀon lan rnoi mpôl đê̆, ngăn ngăn, ntoh bah nău geh ngăn ngăn, n'glêh an trong nkra năn ngăch ta n'gor Thái Nguyên./.   

(Mạnh Phương/VOV1)/Nuĭh rblang: Điểu Thân