Bah nau kan mêt uănh ân saơ, nau kan ntĭm nti phổ thông năm 2018 geh ndâk ngăn, rjăp, rdâl ntơm bah nau mbơh ntĭm jêng nau hun hao nau mĭn, nau blau kon se. Nkô̆ tâm ndrôm săm ƀŭt đă nau dơi bah Bôk nau kan ntĭm nti phổ thông mhe. Nau kan săch ndrôm săm ƀŭt hŏ rgum geh âk mpưm nŭih, nŭih kan khoa học, nai nti blau, bu rnơm, blau âk ngăn râng ƀư.

Yơn lah, bah nau uănh kŏ ân saơ, nau săch, nkra, năl ndrôm săm ƀŭt hôm nau ntoh: N’gâng kan ntĭm nti mô ƀư săch dơi du ndrôm săm ƀŭt tĭng nau ntrŭnh mrô 88 bah Quốc hội gưl 13, ê ƀư ăp nau kan bah Ngih dak, ngăn lah nau mât, dŏng ƀư, hun hao nau ntĭm nti, mât, pă ndrôm săm ƀŭt. Nau ƀư rlong ndrôm săm ƀŭt ê rjăp, ƀư jêng nau hôm ê tŏng mpeh nkô̆ tâm 18 ndrôm săm ƀŭt. Geh nau mô tŏng săm bbŭt ntĭm bah năp năm nrri mhe. Kruanh Uỷ ban Pháp Luật bah Quốc hội Hoàng Thanh Tùng, mbơh:

‘Ăp nau kol rnôk aơ lah nau mô tŏng nau nchră`p tâm rnôk ƀư nau kan, mô lah geh âk nau jêr tâm nau ƀư nau kan kơl an kon se tâm nkuăl jru, nkuăl ngai, mô lah ƀư trong điện tử đah ndrôm săm ƀŭt aơ gay ma ntrŭt dăng nau dŏng nau mhe. Ngăn lah mô di lah săm ƀŭt ma lah ndrôm săm ƀŭt nti điện tử. Nau kan lah dŏng ndrôm săm ƀŭt geh nau rgala mhe. Nchră jru lơn ăp nau ê dơi rnôk nơm mô geh du ndrôm săm ƀŭt bah Ngih dak, tâm nê geh nau rklaih nau kol aơ ndrel nau kan geh âk mô di lah knŭng du ntrong kan nkra ndrôm săm ƀŭt mhe ri ntŭk aơ ân geh nchră ân jru lơn”.

Nau kan ƀư rgâl mhe nau ntĭm nti, ndrôm săm ƀŭt lah nau kan khlay, ndơn geh nau kơl an bah âk ƀon lan ndrel cử tri. Tĭng ăp ntoh măt, bôk nau kan ntĭm nti geh tât nau tâm di pháp lện lah tâm di, yơn bôk nau kan knŭng ntrŭnh nau mbơh tơm. Yơn lah, nkô̆ nau mbơh kŏ geh nau khlay, ân geh nau ƀư rjăp bah ngih dak. Bí thư Trung ương Đảng, Kruanh Uỷ ban Trung ương MTTQ Đỗ Văn Chiến, đă:

‘Nau ân geh ƀư rnôk aơ lah nơm ân geh ntrong kan mêt uănh rjăp tă bah nau nkra, in ƀư, pă dŏng ndrel nơm ân geh n’huch rnoh tăch ndrôm săm ƀŭt ân tâm di đah nau geh bah ƀon lan rnôk aơ. Nŭih ƀon lan đă ndrốm ăm ƀŭt aơ ân geh Ngih dak mât rnoh. Rgâl ma nơm ân geh rƀŏng tât. Yor lah nơm ân moh ntil ndơ ăp nŭih jêr ri gâp ân nê lah ‘play săm ƀŭt” lah jŏ jong ngăn. Đă rmôt kan mêt uănh lah nau nsing geh nau dơi ƀư đŏng lah mô ri ân geh nau mĭn ân rjăp mbơh ân tâm ban”.

Tâm rơh rƀŭn Uỷ ban Rnâng kan Quốc hội, Kruanh Quốc hội Vương Đình Huệ mbơh kloh ngăn nau kan bah ntĭm nti mhe ntrŭnh mbrơi 30 khay rđil đah nau đă. Kruanh Quốc hội ân lah, ân geh uănh nau kan bah ăp nŭih rgâl nau ƀư, ndrôm săm ƀŭt ntĭm nti phổ thông. Ma ngăn lah, nau năl, djăt, rgâl ndrôm săm ƀŭt ê geh rjăp, ƀư tât nau kan hôm e geh nau ê dơi mpeh nau nkô̆ nau tâm 18 ndrôm săm ƀŭt, ngăn lah ndrôm săm ƀŭt Tiếng việt jrâu 1, Khoa học tự nhiên jrâu 6, Lịch sử jrâu 11. Kruanh Quốc hội đă ntrŭnh ndal nau ntĭm mpeh nau kan năl rnoh tăch ndrôm săm ƀŭt, rnoh tăch âk ngăn bah săm ƀŭt, đăp mpăn nau mât nâp rnoh prăk ê nkra, n’huch prăk nkhôm êng, rnoh tăch n’huch ân nơih thuk. Kruanh Quốc hội đă rơh rƀŭn rjăp tĭng nkô̆ nau mrô 88 Quốc hội mpeh nau kan ndrôm săm ƀŭt ntĭm nti phổ thông:

‘Nau ntrŭnh mrô 88 ntrŭnh: N’gâng kan ntĭm nti gay ma săch lah du ndrôm săm ƀŭt tŏng ntơm jrâu 1 tât jrâu 12 geh 137 ndrôm. Ăp ntŭk kan, êng nŭih êng êng geh bonh đă râng ƀư ndrôm săm ƀŭt ngoai mô lah rnoh âk ndrôm tĭng nau dơi, ngăn lah mô kâp nkra tŏng ăp du ndrôm săm ƀŭt ôh. Nuih n’hâm nau ntrŭnh mrô 88 lah kơt nê. Ƀư nau kan aơ rmôt kan mêt uănh nchŏng luh gâp saơ kŏ geh nau nkah, phung nơm ân geh mĭn ntop tay”.

 Kruanh Quốc hội lah rjăp ân geh nau kơl an, ƀư ân rjăp tŏng ăp ntil nau pă tŏng tơm prăk ân ndrôm săm ƀŭt ndrel ntĭm nti, ngăn lah tơm prăk ntrŭnh ƀư Bôk nau kan ntĭm nti năm 2018. Ngăn lah, ân geh n’hao nau nkoch trêng, ntrŭnh ƀư ân rjăp lơn tay nau kan tât cán bộ, nai nti, ăp kơn ƀon lan gay ma gĭt kloh, tă bah nê tâm ban ngăn tâm rnôk ƀư nau kan ntĭm nti năm 2018 geh dơi ăp nkô̆ nau nchrăp luh./.