Tâm nar pah kan, jêh rnôk djăt ntoh măt Chính phủ ndrel rmôt kan mêt uănh mbơh nau kan ƀư ndrel mbơh nau nchră bôk năp bah rmôt kan Mêt uănh mpeh nau ntrŭnh mrô 88 ndrel nau ntrŭnh mrô 51 bah Quốc hội mpeh nau rgâl mhe bôk nau kan, ndrôm săm ƀŭt ntĭm nti phổ thông, ăp nŭih kan mêt uănh ndrel ntoh măt ndrel ntoh măt tâm nchră ăp nkô̆ nau tâm 2 nau mbơh. Tâm nê, ăp nau kan kot: Nchră tât bôk nau kan rgum ndrel ăp nau ntĭm nti; nau kan rgâl mhe ntĭm nti, nau kan nchră tât nau nâp ntĭm nti; Nau săch, năl, ân ƀư, dŏng ndrel rnoh ndrôm săm ƀŭt ntĭm nti; Nau ngăn ndrel nau đă đah nau kan nai nti kon se phổ thông; Ngih nti, ndơ dŏng kơl an nau kan mhe.

Ntoh nau tâm nar pah kan, Groi Kruanh Rnâng kan Quốc hội Trần Thanh Mẫn lah rjăp, ăp nau mbơh sŏng, ngăn ndrel nau rgop prêh. Rmôt kan kơp dơn tŏng ndrel mra mĭn, ƀư jêh nau nchrăp Mbơh nau tă geh uănh ndrel nau ƀư ntrŭnh gay Uỷ ban Rnâng kan Quốc hội geh ƀư nau uănh tĭng nkô̆ rƀŭn tâm khay 8/2023. Đah ăp nau đă bah rmôt kan ntoh măt ăp ntŭk kan, n’gâng kan, rmôt kan geh tâm nchră tâm nar pah kan, đă Chính phủ mĭn, lŏ djăt ăp nau mbơh ngăn gay ma mbơh ntop njoăl tât rmôt kan mêt uănh. Groi Kruanh Rnâng kan Quốc hội Trần Thanh Mẫn đă Chính phủ ân geh kơl an 5 nkô̆ nau, nau kan khlay, tâm nê geh nau kan mpeh nai ntĭm nti:

‘Mpeh rmôt nai nti kon se, aơ lah nau kan tơm gay ma đăp mpăn ân geh nau dơi ngăn bah nau ntrŭnh ƀư Bôk nau kan ntĭm nti phổ thông mhe, đă Chính phủ rđau ăp rmôt kan geh tât kơp, nchră ăp ntil mpeh nau kan, nau dôl geh, nau ŭch hun hao rmôt nau nti tâm rơh tât ndrel geh nau kan ân tâm di, năn gay ma rklaih nau mô tŏng nai ntĭm nti kon se; n’hao nau ntĭm nti ân nai ntĭm kon se ân tŏng nau ŭch Bôk nau kan ntĭm nti phổ thông năm 2018”.

Groi Kruanh rnâng kan Quốc hội Trần Thanh Mẫn kŏ đă Chính phủ uănh kơl an, kơp mbơh nau kan ndrel nau ŭch mpeh ndơ dŏng ntĭm nti; geh ăp nau kan kơl an nkuăl rklaih nau jêr, nkol tâm nau ƀư. Lŏ kơl an, ƀư rjăp nau pă tơm prăk ân ntĭm nti tĭng nau ntrŭnh; Nkre lah kơl n’hao nau kan mêt uănh nau ƀư rgâl mhe nau kan, ndrôm săm ƀŭt.

Bah năp nê, tâm khay 4/2023, Rmôt kan mêt uănh bah Uỷ ban Rnâng kan Quốc hội kŏ hŏ pah kan đah N’gâng kan ntĭm nti mpeh nau ƀư nau ntrŭnh mrô 88 ndrel nau ntrŭnh mrô 51 bah Quốc hội mpeh nau rgâl mhe nau kan, ndrôm săm ƀŭt ntĭm nti phổ thông. Rmôt kan ndơn saơ hôm âk nau kan ân geh ƀư kloh, tâm nê geh nau tŏng prăk ƀư nau kan kŏ kơt lah nau tam bah nau đă ƀư rgâl mhe ntĭm nti. Wa Vũ Thị Lưu Mai, Groi Kruanh Uỷ ban Tơm prăk-Ngân sách bah Quốc hội mbơh nau:

Tâm âk nau kan ri nơm mra dơi rgum tu tơm bah nau rêh, yơn đah nau kan ntĭm nti ri nau kan rgum ăp tơm prăk ƀư văng sa êng êng râng đah nau kan ri kŏ rdâng đah âk nau jêr ngăn. Ndri ma, lah nơm ƀư tĭng nau đă nê lah rgum tu tơm kơl an bah ƀon lan nơih mô lah jêr mhâm ƀư ri kŏ đă lah geh nau mbơh bah Chính phủ kŏ ân geh ơh dơi nau ôp lah geh nau dơi tâm nau rgum tu tơm kơl an đah nau ƀư 2 nau ntrŭnh bah Quốc hội”.

Tâm khay 6 mhe rlau, Kruanh Quốc hội Vương Đình huệ hŏ ƀư tơm nar pah kan đah rđau kan Quốc hội ndrel rmôt kan bah Uỷ ban Rnâng kan Quốc hội mpeh “Ƀư nau ntrŭnh mrô 88 ndrel nau ntrŭnh mrô 51 bah Quốc hội mpeh nau rgâl mhe bôk nau kan, ndrôm săm ƀŭt ntĭm nti phổ thông”. Aơ lah 1 tâm 4 nkô̆ nau mêt uănh bah Quốc hội, Uỷ ban Rnâng kan Quốc hội tâm năm 2023. Kruanh Quốc hội rnê prêh nau kan bah rmôt kan hŏ mêt uănh ƀư ân rjăp ăp nau ntrŭnh bah Quốc hội bah Uỷ ban Rnâng kan Quốc hội, ƀư rjăp ngăn đah nau rđau kan ngăn, ƀư nau kan đah săm ƀŭt mbơh bah Kruanh rmôt kan mêt uănh, Groi kruanh Rnâng kan Quốc hội Trần Thanh Mẫn./.